კობახიძე: ეთიკის კოდექსთან დაკავშირებით პარლამენტში ახალი ინიციატივა შემოვა

„პარლამენტში ახალი ინიციატივა შემოვა და მის საფუძველზე, ჩვენ, დარწმუნებული ვარ, შევთანხმდებით ახალ დოკუმენტზე“,- ამის შესახებ საქართველოს პარლამენტის თავმჯდომარემ „ეთიკის კოდექსზე“ საუბრისას თქვა.

მისი განმარტებით, გუშინ, პლენარულ სხდომაზე კენჭისყრისთვის წარმოდგენილ დოკუმენტთან დაკავშირებით, გარკვეული შენიშვნები იყო.

„ჩვენ გვაქვს დრო იმისათვის, რომ ვიმსჯელოთ. ახალი ინიციატივა შემოვა პარლამენტში და მის საფუძველზე, ჩვენ, დარწმუნებული ვარ, შევთანხმდებით ახალ დოკუმენტზე.

ამ საკითხზე მუშაობა დაიწყო დიდი ხნის წინ. იყო მათ შორის ჩვენი საერთაშორისო პარტნიორების რეკომენდაცია, რომ ასეთი კოდექსი შემუშავდეს. მე არ ვთვლი, რომ არის რამე განსაკუთრებული პრობლემები, რომელთა გადაჭრასაც ჭირდება რაიმე განსაკუთრებული დოკუმენტის მიღება, თუმცა იმისათვის, რომ გრძელვადიან პერსპექტივაში უზრუნველყოფილი იყოს რაიმე სირთულეების პრევენცია, ასეთი ეთიკის კოდექსის მიღება მიზანშეუწონელი არ არის“, - თქვა ირაკლი კობახიძემ.

პარლამენტმა დეპუტატთა ეთიკის კოდექსი გუშინ ჩააგდო.

პარლამენტის წევრის ეთიკის კოდექსი თამარ ჩუგოშვილის, ირინე ფრუიძის, ეკა ბესელიას, გიორგი კახიანის, კახა კუჭავას და გუგული მაღრაძის ინიციატივას წარმოადგენდა. 

პროექტის მიხედვით, კოდექსის დამრღვევი დეპუტატებისთვის სანქციები უნდა დაწესებულიყო. იგულისხმებოდა სამი სახის სანქცია - გაფრთხილება, ხელფასის დაქვითვა (15%-50% ) და საერთშორისო ვიზიტებში მონაწილეობის შეჩერება (6 თვით).