პარლამენტს დეპუტატთა ეთიკის კოდექსის ახალი ვერსია წარუდგინეს

პარლამენტს დეპუტატთა ეთიკის კოდექსის ახალი ვერსია წარედგინა. საპარლამენტო უმრავლესობის წევრების – ირინე ფრუიძის, კახა კუჭავას, თამარ ჩუგოშვილის, გიორგი კახიანის, ეკა ბესელიასა და გუგული მაღრაძის მიერ მომზადებული ცვლილებებს ბიუროს დღევანდელ სხდომაზე გაეცნობიან. ამის შესახებ 1tv წერს.

ეთიკის კოდექსის პროექტი, რომელიც ექვსი მუხლისგან შედგება, პარლამენტის წევრის ქცევას მისი სტატუსიდან გამომდინარე არეგულირებს და იმ წესებს განსაზღვრავს, რაც კანონმდებელმა საქმიანობის დროს, ასევე კოლეგებთან, თანამშრომლებთან, მედიასთან, სხვა ინსტიტუტებთან და საზოგადოებასთან ურთიერთობისას უნდა გაითვალისწინოს.

ცვლილებებით განსაზღვრულია, რომ პარლამენტის წევრისთვის დაუშვებელია ღირსების შემლახველი, უხამსი, სექსისტური, დისკრიმინაციული გამოსვლები, მიმართვები და ქმედებები, ასევე სიძულვილის ენის გამოყენება.

ამასთან, პარლამენტის წევრი ვალდებულია, სამსახურებრივი საკონტაქტო ინფორმაცია ხელმისაწვდომი გახადოს. ასევე პროექტით კონკრეტდება, რომ პარლამენტის წევრმა თანამშრომლებთან ურთიერთობისას არ უნდა მოახდინოს დისკრიმინაცია მათი რასის, ეთნიკური კუთვნილების, სქესის, რელიგიის ან სხვა ნიშნით.

ასევე, პარლამენტის თანამშრომელს ისეთ აქტივობებში ჩართვა არ უნდა დაევალოს, რაც მის სამუშაო აღწერილობას სცდება. ინიციატივით გათვალისწინებულია ეთიკის საბჭოს შექმნა, რომელიც პარლამენტის წევრის მიერ დარღვევებს შეისწავლის და მასზე მონიტორინგს აწარმოებს.

პროექტში ნათქვამია, რომ ეთიკის საბჭო საჩივარს ერთი თვის ვადაში განიხილავს და თუ დაადგენს, რომ კოდექსით ქცევის წესი დაირღვა, დამრღვევს საქართველოს პარლამენტის რეგლამენტის 286-ე მუხლის პირველი ნაწილით გათვალისწინებულ პასუხისმგებლობას აკისრებს.

19 აპრილს პარლამენტმა დეპუტატთა ეთიკის კოდექსი ჩააგდო.

პროექტის მიხედვით, კოდექსის დამრღვევი დეპუტატებისთვის სანქციები უნდა დაწესებულიყო. იგულისხმებოდა სამი სახის სანქცია - გაფრთხილება, ხელფასის დაქვითვა (15%-50% ) და საერთაშორისო ვიზიტებში მონაწილეობის შეჩერება (6 თვით).