უმრავლესობა პარტიაში ბიძინა ივანიშვილის დაბრუნების აუცილებლობას განმარტავს

ქართული ოცნება - დემოკრატიული საქართველოს თავმჯდომარის თანამდებობაზე ბიძინა ივანიშვილის დაბრუნების საკითხს პარლამენტის თავმჯდომარე ირაკლი კობახიძე, თბილისის მერი კახა კალაძე, საპარლამენტო უმრავლესობის ლიდერი არჩილ თალაკვაძე გამოეხმაურნენ.

პარლამენტის თავმჯდომარის შეფასებით, საუბარია მხოლოდ და მხოლოდ პარტიის გაძლიერებაზე. კობახიძე დასძენს, რომ ამ მიმართულებით მუშაობისთვის, "სამწუხაროდ, ნაკლებად აქვთ დრო პრემიერმინისტრს და პოლიტიკური თანამდებობის სხვა პირებს."

"ჩვენ ვსაუბრობდით ძალიან ხშირად, მათ შორის პარტიულ კოსკონფერენციებზე. ასე, რომ საჭიროა ზომების მიღება, რათა კიდევ უფრო გაძლიერდეს ჩვენი პოლიტიკური პარტია "ქართული ოცნება". საჭიროა ჩვენი პარტია საბოლოოდ ჩამოყალიბდეს როგორც ევროპული ტიპის პოლიტიკური გაერთიანება. ამას სჭირდება განსაკუთრებული ძალისხმევა, განსაკუთრებული რესურსი და ამ კუთხით ძალიან მნიშვნელოვანია, რომ სათავეში ჩაუდგება როგორც თავმჯდომარე ბატონი ბიძინა ივანიშვილი, რომელიც სათავეში ჩაუდგება რეფორმების ახალ ტალღას პარტიაში.

ეს გადაწყვეტილება ვერავითარ და არავითარ გავლენას არ მოახდენს სხვა საკადრო საკითხებზე, გადაწყვეტილებაზე. ყველაფერი რჩება ისე როგორც არის, პარლამენტის თავმჯდომარე, პრემიერმინისტრი და ა.შ. საუბარია იმაზე, რომ ბატონო ბიძინა ივანიშვილი სათავეში ჩაუდგება პარტიას და პოლიტიკურ პროცესებში იქნება ჩართული, როგორც პარტიის თავმდჯომარე, ამ თანამდებობის ფუნქციების შესაბამისად", - განაცხადა ირაკლი კობახიძემ.

ბიძინა ივანიშვილის პოლიტიკაში დაბრუნებას კახა კალაძემ "სასიხარულო" უწოდა. "დაბრუნების გადაწყვეტილება განპირობებული იყო იმით, რომ გვინდა პარტია კიდევ უფრო გავაძლიეროთ", - თქვა კალაძემ.

შეკითხვაზე: "ივანიშვილის გარეშე ვერ შეძელით პარტიის გაძლიერება?", კალაძე პასუხობს: "ჩვენ თუ გავიხსენებთ ყველა არჩევნებს, რომლებიც 2012 წლიდან დღემდე იყო ჩატარებული, შედეგები ყველაფერს აჩვენებს. რაც შეეხება პარტიის განვითარებას, ცუდი არაფერია იმაში, რომ გვინდა უფრო მეტი გავაკეთოთ. ის იქნება მხოლოდ პარტიის თავმჯდომარე. განხორციელდება თუ არა პარტიაში სხვა ცვლილებები ეს ყრილობაზე გაირკვევა", - განაცხადა კახა კალაძემ.

პრემიერის მიერ გამოცხადებულ სიახლეს აფასებს საპარლამენტო უმრავლესობის ლიდერი არჩილ თალაკვაძეც. მისი თქმით, ეს ინიციატივა გიორგი კვირიკაშვილს დიდი ხნის წინ ჰქონდა და ამ თემაზე ბიძინა ივანიშვილმა რამდენიმე კონსულტაციაც გაიმართა.

"ჩვენც, საპარლამენტო უმრავლესობიდან პარტიის ლიდერები მხარს ვუჭერთ ამ გადაწყვეტილებას. მე დარწმუნებული ვარ მისი ხელმძღვანელობთ პარტია გახდება კიდევ უფრო ეფექტური და გააჯანსაღებს იმ პოლიტიკურ პროცესს რომელიც საქართველოშია", - განაცხადა არჩილ თალაკვაძემ.

სიახლეს გამოეხმაურა მამუკა მდინარაძეც. "აქ არ არის გადარჩენაზე საუბარი, აქ არის საუბარი ახალ პოზიტიურ იმპულსზე, რომელიც გააძლიერებს ბიძინა ივანიშვილის ჩართულობით პარტიას. არჩევნებიდან არჩევნებამდე პარტია ძლიერდებოდა, მაგრამ კიდევ უფრო მეტი პოზიტივისთვის, მეტი სწორი მენეჯმენტისათვის, იმისათვის რომ ასეთი ავტორიტეტულმა ადამიანმა თავისი ავტორიტეტი და რესურსი გამოიყენოს მის მიერ დაფუძნებული პარტიის გაძლიერებისათვის, ამიტომ ის ადამიანი დაეთანხმა ჩვენი და პრემიერის შეთავაზებას", - თქვა მამუკა მდინარაძემ.

ბიძინა ივანიშვილი "ქართული ოცნება-დემოკრატიული საქართველოს" თავმჯდომარე გახდება. პრემიერმინისტრ გიორგი კვირიკაშვილის განცხადებით, ბიძინა ივანიშვილი ამ შეთავაზებას დათანხმდა. ბიძინა ივანიშვილს ქართული ოცნების თავმჯდომარედ უახლოეს ყრილობაზე უყრიან კენჭს.