პრეზერვატივების მწარმოებელ კომპანია „აიისას“ მერიამ ოქმი შეუდგინა

თბილისის მერიამ „ქართული იდეის“ განცხადების პასუხად, ინდმეწარმე ანი გაჩეჩილაძეს, რომელიც კომპანია „აიისას“ დამფუძნებელია, რეკლამის დაკვეთის, წარმოებისა და გავრცელებისათვის დადგენილი წესების შესაძლო დარღვევისთვის ადმინისტრაციული სამართალდარღვევის ოქმი შეუდგინა. ოქმი განსასჯელად თბილისის საქალაქო სასამართლოს გადაეგზავნება. ამის შესახებ "ლიბერალი" წერს.

ადმინისტრაციულ სამართალდარღვევათა ოქმი მერიამ ადმინისტრაციულ სამართალდარღვევათა კოდექსის 159-ე მუხლის საფუძველზე შეადგინა. მისი დარღვევა გამოიწვევს ფიზიკური პირის დაჯარიმებას 500 ლარით, ხოლო იურიდიული პირის, დაწესებულების, ორგანიზაციის დაჯარიმებას 3000 ლარის ოდენობით.

თბილისის მერიის განცხადებით პარტია „ქართულმა იდეამ“ 27 მარტს მიმართა. როგორც განცხადებაშია აღნიშნული, „აიისას“ პროდუქციაზე აღბეჭდილია „საქართველოს მეფე წმიდა თამარის გამოსახულება და იქვე გვერდით წარწერაა „სამეფო კარი თამარში.“

„განსაკუთრებით აღმაშფოთებელია ის, რომ პრეზერვატივზე გამოსახულია ადამიანის ხელი, რომლის სამი თითი (ნეკა, ცერა, არათითი) მოხრილია, ხოლო ორი (საჩვენებელი და შუათითი) გასწორებულია. ორ გასწორებულ თითზე ჩამოცმულია პრეზერვატივი. პრეზერვატივზე გამოსახული ხელის ფორმით საქართველოს მართლმადიდებელი ეკლესიის სასულიერო პირები მღვდელმოქმედებისას გამოსახავენ ჯვარს და ასევე ამ ფორმით ლოცავენ მრევლს”, – წერია განცხადებაში.

„აიისას“ დამფუძნებელმა თქვა, რომ სასამართლოს საქმე ჯერ წარმოებაში არ მიუღია.

„მაგრამ წარმოებაში მიღების შემთხვევაშიც, ეს არის აღქმის საკითხი და ძალიან საკამათოა. რელიგიური გრძნობების შეურაცხყოფის შესახებ რომ იყოს კანონი, კიდევ მესმის, მაგრამ ახლა უშუალოდ მოსამართლეზეა დამოკიდებული, როგორ აღიქვამს ამ საკითხს. მაგრამ, ფაქტია, რომ მარაზმია“, - ამბობს გაჩეჩილაძე. 

საქართველოს საპატრიარქომ 20 მარტს განცხადება გაავრცელა, რომელშიც ბრენდ "აიისა"-ს რელიგიური გრძნობების შეურაცხყოფაში დასდო ბრალი. საქმე ეხება პრეზერვატივის შეფუთვას, რომელიც სხვადასხვა სახით არსებობს, მათ შორის ერთ-ერთ შეფუთვაზე თამარ მეფის ნახატია გამოსახული.

კომპანიამ 30 მარტს განაცხადა, რომ ის სამართლებრივ ბრძოლას იწყებს იმ პირების წინააღმდეგ, რომლებიც პრეზერვატივის შეფუთვაზე თამარ მეფისა და ქართლის დედის გამოსახვასთან დაკავშირებით მუქარის შემცველ განცხადებებს აკეთებენ. 

19 აპრილს პარლამენტთან კომპანია „აიისას“ წინააღმდეგ მდუმარე აქცია გაიმართა.