ევროკავშირმა ადამიანის უფლებების სფეროში სამაგალითო 15 ქვეყანას შორის საქართველო დაასახელა

ადამიანის უფლებების სფეროში სამაგალითო და წარმატებულ 15 ქვეყენას შორის საქართველოც მოხვდა. ეს ის ქვეყნებია, სადაც ჩამოყალიბდა და დამკვიდრდა ადამიანის უფლებების კარგი სისტემა. ინფომაციას საგარეო საქმეთა სამინისტრო ავრცელებს.

ეს ევროკავშირის ახალი ინიციატივაა სახელწოდებით „Good Human Rights Stories” (GHRS). საგარეო უწყების ცნობით, საქართველო რეგიონში ერთადერთია, რომელიც ამ სიაში მოხვდა.

„საქართველოს აქვს შესანიშნავი მიღწევები  ადამიანის უფლებების დაცვის შესრულების კუთხით.  ეს საკითხი, იმ გამოწვევების ჩათვლით რაც კიდევ არსებობს,  სხვებისთვის გასაზიარებლად ძალიან შთამბეჭდავი იქნება. მოხარული ვარ, რომ არსებობს სურვილი კიდევ უფრო მჭიდროდ ვითანამშრომლოთ ამ ინიციატივის ფარგლებში. ჩვენ, როგორც ევროკავშირი, ვამაყობთ საქართველოს პარტნიორობით ამ გარდამავალ ეტაპზე , ადამიანის უფლებების სფეროში და ჩვენ მხარს ვუჭერთ თქვენს გადაწყვეტილებებს, რათა უზრუნველყოთ ყოველდღიურად ადამიანის უფლებების დაცვის გაუმჯობესება. ეს ჩვენ ყველას გვჭირდება“, -აღნიშნა ადამიანის უფლებათა საკითხებში ევროკავშირის სპეციალურმა წარმომადგენელმა სტავროს ლამბრინიდისმა საგარეო საქმეთა მინისტრ მიხეილ ჯანელიძესთან შეხვედრის დასრულების შემდეგ.

ინიციატივა 2018 წელს, „ადამიანის უფლებათა საყოველთაო დეკლარაციის“ მიღებიდან 70 წლის იუბილის აღსანიშნავად, ადამიანის უფლებათა დაცვის საკითხებში ევროკავშირის სპეციალურმა წარმომადგენელმა, სტავროს ლამბრინიდისმა წარმოადგინა. ის მიზნად ისახავს ხელი შეუწყოს მსოფლიოში ადამიანის უფლებათა დაცვის მიმართულებით ახალი პოზიტიური ნარატივის გავრცელებას. 

ადამიანის უფლებათა საკითხებში ევროკავშირის სპეციალური წარმომადგენელი სტავროს ლამბრინიდისი საქართველოში პირველი ოფიციალური ვიზიტით არის ჩამოსული.