ევროპელი პრეზიდენტების დამოუკიდებლობის დღისადმი მიძღვნილი გზავნილები საქართველოს

პირველი დემოკრატიული რესპუბლიკის დაარსებიდან 100 წლის აღსანიშნავად, წვევამდელების ფიცის დადების საზეიმო ცერემონია ერთდროულად თბილისში, შინდისში, ვარძიაში, კოჯორში-ქოროღლისციხესთან, ბათუმსა და გელათში ერთდროულად გაიმართა.

ფიცის დადების შემდეგ კი მაღალი დონის სტუმრებმა სიტყვით მიმართეს საზოგადოებას.

ევროპის კომისიის პრეზიდენტმა ჟან-კლოდ იუნკერმა ფიცის დადების ცერემონიის შემდეგ განაცხადა, რომ დღევანდელი დღე მთელი ევროპისთვის ისტორიული მომენტია. "საქართველო ყოველთვის იყო ევროპის ნაწილი, ჩვენს ურთიერთობაში ახალი თავი იწყება", - განაცხადა იუნკერმა.

ლიეტუვის პრეზიდენტმა დალია გრიბაუსკაიტემ საქართველოს მოსახლეობას საქართველოს პირველი დამოუკიდებელი რესპუბლიკის 100 წლისთავი ქართულ ენაზე მიულოცა. 

"გამარჯობა, საქართველო. ვულოცავ საქართველოს მოსახლეობას 100 წლისთავს. ამიერიდან, ჩვენ თქვენს ქვეყანას - საქართველოს ვუწოდებთ. ეს ჩვენი სიმბოლური საჩუქარია თქვენდამი. დიდება, საქართველოს!“, - განაცხადა ლიეტუვის პრეზიდენტმა დალია გრიბაუსკაიტემ. 

პრეზიდენტმა ანდჟეი დუდამ საქართველოსა და პოლონეთის ისტორიები შეადარა და განაცხადა, რომ ამ ორმა ქვეყანამ "თითქმის ერთნაირი სიმწარე გამოსცადა საუკუნეების განმავლობაში". დუდას თქმით, საქართველო სუვერენობისა და თავისუფლებისადმი თავდადებითა და ერთგულებით, რეგიონის ქვეყნებს შორის გამორჩეულია.

"საქართველო არის პოლონეთის ძმური ქვეყანა, ჩვენ დაკავშირებული ვართ ერთმანეთთან სიყვარულით, მეგობრობით და თანამშრომლობით. ჩვენც და თქვენც ვიბრძოდით მრავალი საუკუნის მანძილზე იმისთვის, მიგვეღწია თვითგამორკვევისთვის. დამოუკიდებლობა ჩვენი სამშობლოებისთვის ყველაზე უფრო დიდი ღირებულებაა", - განაცხადა ანდჟეი დუდამ და დასძინა, რომ ქართველებს და საქართველოს აქვს უფლება, რომ იყოს დამოუკიდებელი, იცხოვროს მშვიდობიან გარემოში და იაროს ინტეგრაციის გზით.

"პოლონეთი მხარს უჭერს მუდმივად საქართველოს მცდელობას ევროპული და ევროატლანტიკური ინტეგრაციის მოპოვების გზაზე", - განაცხადა პოლონეთის პრეზიდენტმა.

სლოვაკეთის პრეზიდენტ ანდრეი კისკას განცხადებით კი ქართველები შრომისმოყვარე, მებრძოლი ადამიანები არიან, რომლებიც არასდროს წუწუნებენ.

"ჩვენ ყველანი ერთად ვართ ევროპაში და დარწმუნებული იყავით, რომ ჩვენ აგრეთვე ევროკავშირის ოჯახში ძალიან მაღალ მდგომარეობას ვანიჭებთ საქართველოს. თქვენ ჩვენი მეგობრები ხართ, ხოლო ჩვენ, თქვენს გვერდით ვართ და ერთად ვიბრძვით. გაუმარჯოს საქართველოს", - განაცხადა სლოვაკეთის პრეზიდენტმა.

დამოუკიდებლობის 100 წლის იუბილე მიულოცა საქართველოს ფინეთის პრეზიდენტმა საული ნიინისტემ, რომელმაც ფიცის დადების ცერემონიის შემდეგ საზოგადოებას მიმართა.

"ყოველი დემოკრატიული სახელმწიფოს საფუძველია - თავისუფლება, თანასწორობა, განათლება, იმისათვის, რომ დინამიური, სიცოცხლით სავსე საზოგადოება ავაგოთ. ერთად ყოფნის პრინციპი საერთაშორისო ურთიერთობებსაც ეხება. რა თქმა უნდა, პარტნიორებთან თანამშრომლობა, მეგობრობა სარგებლობას ანიჭებს თითოეულ მხარეს, ქვეყანას. საქართველო არაა მხოლოდ ფინეთის პარტნიორი, ის აგრეთვე არის ჩვენი ქვეყნის მეგობარი. საქართველომ ძალიან დიდ პროგრესს მიაღწია რეფორმების განვითარების გზაზე და იმედი მაქვს, რომ ამ ბილიკს ის არ გადაუხვევს", - განაცხადა ფინეთის პრეზიდენტმა.

სიტყვით გამოვიდა სომხეთის პრეზიდენტი არმენ სარქისიანი. მისი განცხადებით, ქართველები და სომხები როგორც ერთი ერთი ისე ცხოვრობენ. 

"ვცხოვრობთ როგორც ძმები და დები ერთმანეთის გვერდით, ეს საოცარი ფაქტია, რომ ორი ერი ცხოვრობს ერთად, იბრძვის ერთად, თავიანთი დამოუკიდებლობისა და ღირსებისთვის მრავალი ასეული წლის მანძილზე და არასოდეს გვქონია ჩვენ რაიმე მნიშვნელოვანი კონფლიქტი და გაუგებრობა. ეს ჩვენთვის ძალიან დიდი ღირებულებაა", - განაცხადა სომხეთის პრეზიდენტმა.