რამდენად შეძლებს მანდატური მაღალკონტინგენტიან სკოლაში ტრაგიკული მოვლენების პრევენციას

მოსწავლეებს შორის ხორავას ქუჩაზე სისხლიანი დაპირისპირების შემდეგ საზოგადოება უსაფრთხო სკოლის აუცილებლობაზე ალაპარაკდა. შინაგან საქმეთა და განათლების სამინისტროებმა მთავრობის დავალებით შეიმუშავეს საკანონმდებლო ცვლილებათა პაკეტი, რომელიც მანდატურის სამსახურის დახვეწას ეხება. რამდენიმე დღის წინ საკანონმდებლო ცვლილებებს პარლამენტმა პირველი მოსმენით მხარი დაუჭირა.

edu.aris.ge-ი სამოქალაქო განვითარების ინსტიტუტის წარმომადგენლის, განათლების სპეციალისტის, თამარ მოსიაშვილის მოსაზრებას ავრცელებს, თუ რამდენად არის შესაბამისი საკანონმდებლო ცვლილებები იმასთან, რაც დღეს სკოლაში უსაფრთხოების საკითხების მოგვარებისთვის საჭიროა.

თამარ მოსიაშვილის თქმით, მთელი საქართველო შეწუხებულია იმ ძალადობის ფაქტების გამო, რომელიც ხორავას ქუჩაზე მოხდა. მე მგონია, რომ ამ საშინელმა ტრაგედიამ დააჩქარა პროცესის ინიცირება.

"პრობლემა არის ის, რომ ყველაზე ფუნდამენტური საკითხები არის ყურადღების მიღმა დარჩენილი. ძირითადი აქცენტი გადატანილია, როგორ უნდა გაიჩხრიკოს მოსწავლე, როგორი დახმარება უნდა გაუწიოს ფსიქოლოგმა და ა.შ. თუმცაღა არავის გაუანალიზებია, სად მოხდა ეს კონფლიქტი. მასში მონაწილეობდნენ 51-ე და პირველი ექსპერიმენტული სკოლის მოსწავლეები.

საზოგადოება არ მსჯელობს იმ საკითხებზე, რომ ამ სკოლებში მოსწავლეთა რაოდენობა ძალიან დიდია და თუ მოსწავლეთა ამ რაოდენობას შევინარჩუნებთ, დაახლოებით, 2 500-მდე ბავშვია ერთ სკოლაში, მაღალკონტიგენტიანი სკოლაა, რამდენად შეძლებს მანდატური, ამგვარი ტრაგიკული მოვლენების პრევენციას, რომელსაც ავალებენ? ეს ხომ ის სკოლებია, სადაც მანდატური იყო სკოლაში, სადაც ვიდეოთვალი იყო, თუმცა, ჩვენდა სამწუხაროდ, ამგვარი ტიპის საშინელი სისხლისღვრა თავიდან ვერ ავიცილეთ.

დღესაც სახელმწიფო მორიგ ჯერზე პასუხისმგებლობას იღებს 2 100 საჯარო სკოლის უსაფრთხოების საკითხზე, მაშინ როცა ამდენი სკოლის უსაფრთხოებაზე თავად სკოლა, მშობელი, მასწავლებელი სასკოლო საზოგადოებაა პასუხისმგებელი.

მოსიაშვილი განმარტავს, რომ როცა სკოლა თვითონ არ ქირაობს მანდატურს, თავისთავად სკოლაში კონფლიქტების მართვა ვერ განვითარდება, იმიტომ რომ კონფლიქტების მართვისთვის მას ჰყავს მანდატური, რომელიც ანგარიშვალდებული იქნება მანდატურის სამსახურთან.

ქართულ სახელმწიფოს არ აქვს გაცნობიერებული, რომ 2 100 საჯარო სკოლა განსხვავებულია და ყველა სკოლას მანდატური არ სჭირდება. რადგან ბავშვთა უსაფრთხოება ფართო ცნებაა ძალიან და მისი რისკები განსხვავებული შინაარსის შეიძლება იყოს.

საქართველოს პარლამენტმა კანონპროექტი „ზოგადი განათლების შესახებ“ პირველი მოსმენით მიიღო. ცვლილებებს მხარი 71-მა დეპუტატმა დაუჭირა.

მანდატურს შესაძლებლობა ექნება, მოსწავლის შეყოვნების მექანიზმი გამოიყენოს. ცვლილებებით, სკოლებში უსაფრთხოების უზრუნველყოფის მიზნით, შიდა და გარე პერიმეტრზე ვიდეოკამერების არსებობა სავალდებულო გახდება.