მეუფე დიმიტრი: ვგრძნობ, რომ ეს შავი ღრუბელი ჩემს თავზეა

ბათუმისა და ლაზეთის მიტოპოლიტი დიმიტრი შიოლაშვილი პრესკონფერენცია გამართა. მედიასთან შეხვედრა 19:00 საათზე დაიწყო. პრესკონფერენცია პირდაპირ ეთერში აჭარის ტელევიზია გადასცა. მეუფე დიმიტრი ჟურნალისტების შეკითხვებს ერთი საათის განმავლობაში პასუხობდა. ბრიფინგი ანდრია პირველწოდებულის სახელობის გიმნაზიაში ჩატარდა.

მიტროპოლიტის თქმით, მას არ უარყვია დეკანოზ გიორგი მამალაძესთან ურთიერთობა. მისი თქმით ის დეკანოზის ერთი შვილის ნათლიაა.

მეუფე დიმიტრიმ განაცხადა, რომ მეუფე პეტრე ცაავას შეფასებებს არ ეთანხმება, თუმცა მისი აზრით ის შემოქმედი მღვდელთმთავარია. მე აღვკვეცე ის ბერად სტეფანწმინდაში. მაქვს კარგი კეთილი ურთიერთობა მასთან, ყოველშემთხვევასი ასე იყო დღემდე, - თქვა მიტროპოლიტმა.

მეუფეს თქმით, მან არ იცის დაკითხავენ თუ არა პროკურატურის წარმომადგენლები. ამის შესახებ ინფორმაცია არ აქვს. 

მისი თქმით, პატრიარქს ჯერ კიდევ გერმანიაში უნდოდა დეკანოზ გიორგი მამალაძესთან შეხვედრა, მაგრამ პროკურატურის თხოვნის შემდეგ, თავი შეგვეკავებინა დეკანოზთან შეხვედრისგან, მან ეს თხოვნა გაიზიარა და ჩვენც გადმოგვცა.

შეკითხვაზე, როგორ შეაფასებს ეკლესიის ირგვლივ დაწყებულ პროცესებს, მეუფემ თქვა, რომ პროცესი ეკლესიის დისკრედიტაციას ემსახურება, და მის წინააღმდეგაა მიმართული, შეიძლება იმის გამო, რომ დეკანოზი გიორგი მამალაძე მასთან მსახურობდა. "მე ვგრძნობ, რომ ეს შავი ღრუბელი ჩემს თავზეა თავმოყრილი. ვერ გეტყვით, რატომ, თუმცა ალბათ დადგება დრო და ყველაფერს ფარდა აეხდება", განაცხადა მეუფემ. 

მეუფე დიმიტრის თქმით, მას უნდა, რომ დეკანოზ გიორგი მამალაძესთან დაკავშირებული ეჭვები არ გამართლდეს, ჩემი ოცნებაა ის უდანაშაულო აღმოჩნდეს.

მიტროპოლიტმა თქვა, რომ ადასტურებს იმ ფაქტს, რომ სოსო ოხანაშვილი მისი შვილის მეუღლეა, მაგრამ მანამდე წლების განმავლობაში იყო პატრიარქის უსაფრთხოების სამსახურის ხელმძღვანელი. ის გამოირჩევა პატრიარქისადმი უდიდესი სიყვარულით და პატივისცემით. ის პროფესიონალი სამხედროა. წინა ხელისუფლების დროს, ის დაითხოვეს სამხედრო ძალებიდან, იმის გამო მიტინგების დარბევაში მონაწილეობაზე არ დათანხმდა. ხელისუფლების შეცვლის შემდეგ, მას ჰქონდა შემოთავაზება ჯარიდანაც, მაგრამ მან უარი თქვა და პატრიარქთან ყოფნა არჩია, - განაცხადა მეუფემ.

შეკითხვაზე, რა იცის "ოქროს თევზების" შესახებ, კერძოდ პატრიარქის მდივან-რეფერენტის შორენა თეთრუაშვილის ფავორიტ მღვდელთმავრებზე, მიტროპოლიტმა თქვა, რომ შორენა თეთრუაშვილს ახასიათებს ავკარგიან ადამიანად, და რომ თეთრუაშვილი მისი ნათესავია - მისი ერთ-ერთი შვილიშვილის ნათლია.       

მეუფე იაკობზე მიტროპოლიტმა თქვა, რომ ისიც მისი ნათესავია, კერძოდ სოსო ოხანაშვილის შვილის, ანუ მისი შვილიშვილის ნათლიაა და მასთან აქვს ძალიან კარგი ურთიერთობა, ჯერ კიდევ ყაზბეგიდან, სტეფანწმინდიდან, სადაც იაკობი მსახურობდა.

მიტროპოლიტმა დიმიტრიმ განაცხადა, რომ არ აქვს საფუძველი იფიქროს, რომ მთელი ამ აურზაურის უკან ხელისუფლება დგას. მან აღნიშნა, რომ მართალია, ასეთი სიამტკბილობა და კარგი ურთიერთობა ხელისუფლებას და ეკლესიის წარმომადგენლებს შორის არ ახსენდება, თუმცა დეკანოზის ირგვლივ დაწყებულ აჟიოტაჟში ხელისუფლების კვალს ვერ ხედავს.

მეუფე დიმიტრის თქმით, მისი პატრიარქობა გამორიცხულია, რადგან მისი აზრით ერთ ეპოქაში, ერთი ოჯახიდან ორი პატრიარქი ზედმეტია.