ეკა ბესელია მზად არის შემოქმედებითი ნაწარმოების აკრძალვის კანონპროექტზე უარი თქვას

პარლამენტის იურიდიულ საკითხთა კომიტეტის თავმჯდომარე ეკა ბესელია მზად არის უარი თქვას მისი კომიტეტის მიერ მომზდებულ ცვლილებებზე, რომელიც შემოქმედებითი ნაწარმოების გავრცელების აკრძალვის შესაძლებლობას იძლევა. ამის შესახებ ინფორმაციას სააგენტო "ინტერპრესნიუსი" ავრცელებს.

"ამ კარგმა ინიციატივამ არასწორი ინტერპრეტაციები რომ არ გამოიწვიოს, მე პირადად მზად ვარ, რომ უარი ვთქვა ამ კანონპროექტზე - ეს არაფერს დააზიანებს, კონსტიტუციის სტანდარტი მაინც იმოქმედებს და კონსტიტუციის ჩანაწერი არის უპირატესი", - განაცხადა ეკა ბესელიამ.

ბესელიას თქმით, ამ საკითხით დაინტერესებულ მხარეებთან შეხვედრაც იგეგმება. 

"რეალურად, ინიციატივა ეხება სხვა რამეს, სრულიად უწყინარ, მხოლოდ კონსტიტუციის შესაბამისი პრინციპის გადმოტანას კანონში და არანაირ სხვა შეზღუდვას. ეს ცვლილება ეხებოდა უფრო მაღალი სტანდარტის დაწესებას და მეტი დაცვის მექანიზმის შექმნას, ვიდრე პირიქით. ამიტომ, პირველი, რაც გვინდა, არის ის, რომ შევხვდეთ ამ ადამიანებს და გვინდა ეს იყოს ძალიან გულწრფელი და ინფორმაციული შეხვედრა. მეორე, არანაირი პრობლემა არ არის, თუ საერთოდ არანაირ ცვლილებას არ განვახორციელებთ „კულტურის შესახებ კანონში", - თქვა ბესელიამ.

მაისის შუა რიცხვებში ცნობილი გახდა, რომ შემოქმედებითი ნაწარმოების გავრცელება მხოლოდ სასამართლოს მეშვეობით აიკრძალება. ცვლილებებით სასამართლოსადმი დაქვემდებარებულ სამოქალაქო საქმეების ჩამონათვალს შემოქმედებითი ნაწარმოების გავრცელების აკრძალვასთან დაკავშირებული საქმეები დაემატება, თუ ნაწარმოების გავრცელება სხვათა უფლებებს ლახავს. ცვლილების ავტორები ეკა ბესელია და ლევან გოგიჩაიშვილი არიან.

ცვლილებები სახალხო დამცველმა ნინო ლომჯარიამ გააკრიტიკა და მას არაკონსტიტუციური უწოდა.