კვირიკაშვილი: რადიკალიზებული ჯგუფები აყენებენ არამართლზომიერ პოლიტიკურ მოთხოვნებს

„ქართული ოცნების“ ცენტრალურ ოფისში პარტიის პოლიტსაბჭოს სხდომა გაიმართა. სხდომაზე განსახილველი ორი ძირითადი საკითხი იყო. მათ შორის ერთ-ერთი ხორავას ქუჩაზე მომხდარი მკვლელობის შესახებ საპარლამენტო კომისიის შექმნას ეხებოდა. 

შეხვედრას, პარტიის თავმჯდომარე ბიძინა ივანიშვილი, საქართველოს პრემიერმინისტრი გიორგი კვირიკაშვილი, პარლამენტის თავმჯდომარე ირაკლი კობახიძე და სხვები ესწრებოდნენ.

შეხვედრის შემდეგ მედიასთან კომენტარი გააკეთა პრემიერმა. 

"არასტაბილურობის შექმნის საფუძველს არავის მივცემთ, ვიზრუნებთ, რომ ქვეყანაში სტაბილურობა იყოს. რაც შეეხება ადამიანებს, რომლებსაც აქვთ უსამართლობის განცდა, ჩვენ რა თქმა უნდა, ვართ ხელისუფლება, რომლისთვისაც ეს არის სერიოზული გამოწვევა და ასეთ კითხვებზე, რომელიც საზოგადოებაში, არის პასუხის გაცემის ფორმატები, არის ის ფორმატები, რომელიც ახლა მოგახსენეთ და ასეთ ფორმატებში უნდა გაეცეს ყველა კითხვას პასუხი და აუცილებლად გაეცემა. რაც შეეხება იმას, რომ კონკრეტულად რადიკალიზებულ ჯგუფებს უნდათ, რომ არასტაბილურობის განცდა გააჩინონ და აყენებენ აბსოლუტურად არამართლზომიერ პოლიტიკურ მოთხოვნებს, ჩვენ არასტაბილურობის შექმნის საფუძველს არავის მივცემთ. ჩვენი ხელისუფლება ზრუნავს, რომ საზოგადოებას მაქსიმალურად გაეცეს ყველა კითხვაზე პასუხი, მაგრამ ასევე ჩვენ ვიზრუნებთ, რომ იყოს ქვეყანაში სტაბილურობა“, – განაცხადა გიორგი კვირიკაშვილმა.

მისი თქმით, ეს პროცესები ნაციონალური მოძრაობის მიერაა მართული, რაც თავიდანვე ცხადი იყო, ახლა კი უფრო მეტად მოეფინა ნათელი.

დღეს რუსთაველზე ოპოზიციური პარტიების აქცია 18:00 საათზეა დაგეგმილი. „ნაციონალური მოძრაობამ“ და სხვა ოპოზიციურმა პოლიტიკურმა პარტიებმა განაცხადეს, რომ ისინი გაერთიანებული ძალებით აპირებენ სისტემის წინააღმდეგ ბრძოლას და 18:00 საათზე საინფორმაცია აქცია დაანონსეს, სადაც მომავალ გეგმებზე ისაუბრებენ. 

დღესვე, ვაკის პარკში აქცია „აღდგეს სამართლიანობა პოლიტიკოსების გარეშე“ გაიმართება. აქცია 15:00 საათზე არის დაგეგმილი და ის ხორავას ქუჩაზე მოკლული არასრულწლოვნების ლევან დადუნაშვილისა და დავით სარალიძის ოჯახების სოლიდარობის ნიშნად იმართება.

2017 წლის 1 დეკემბერს თბილისის ცენტრში, ვერაზე ორი არასრულწლოვანი დავით სარალიძე და ლევან დადუნაშვილი დაჭრეს. ერთი მოზარდი საავადმყოფოში მიყვანამდე გარდაიცვალა. მეორე - მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა.

31 მაისს ხორავას ქუჩაზე მოზარდების მკვლელობის საქმეზე მოსამართლემ განაჩენი გამოაცხადა. პროკურატურა განაჩენს სააპელაციოში გაასაჩივრებს.

31 მაისიდან ზაზა სარალიძე აქციებს მართავს. მიუხედავად იმისა, რომ აქციაზე რამდენიმე დღე აცხადებდნენ, რომ პროტესტს პოლიტიკური ელფერი არ ჰქონდა, დღეს 3 ივნისის, ხმამაღლა განაცხადეს, რომ აქცია პოლიტიკურია და სისტემის წინააღმდეგაა მიმართული.