მოძრაობა „ნუ მომკლავ“ დამფუძნებლის თქმით, მას ელისო კილაძის შვილი ემუქრება

„ნუ მომკლავ“ დამფუძნებელმა, შალვა კუჭაშვილმა ვაკის პარკში გამართულ აქციაზე თქვა, რომ ელისო კილაძის შვილი ემუქრება. შალვა კუჭაშვილის თქმით, დავით ხარშილაძე Facebook-ზე მუქარის შემცველ შეტყობინებებს უგზავნის.

"კილაძის შვილი, დავით ხარშილაძე მიგზავნის ფეისბუქზე მუქარისა და გინების შემცველ წერილებს.
მომწერა, რომ მომივლიან როგორც საჭიროა, წაშალე სტატუსი თორემ ყურს აგიწევენ უბანში ბიჭები, გითვალთვალებ აქციაზე ჩემი ხალხია", - ამბობს შალვა კუჭაშვილი

კუჭაშვილი ასევე ამბობს, რომ ელისო კილაძემ Facebook-ზე ცრუ ინფორმაცია გაავრცელა. 

"ელისო კილაძემ დაწერა ჩემზე რომ ვარ სუსის აგენტი და ქართული ოცნების წევრი გაავრცელა ჩემი და შალვა ოგბაიძის ფოტოები. მე ვუპასუხე ჩემი ფეისბუქგვერდით, რომ ელისო კილაძე ვერავისთან ურთიერთობას ვერ დამიშლის, რასაც ის ავრცელებს არის ცრუ ინფორმაცია, ხოლო შალვა ოგბაიძე ჩემი მეგობარია. ეს ყველაფერი დამაბრალეს იმის გამო, რომ გავემიჯნე პარლამენტთან მიმდინარე პოლიტიკურად ანგაჟირებულ აქციას", - თქვა კუჭაშვილმა.

ცოტა ხნის წინ ცნობილი გახდა, რომ მოძრაობის „ნუ მომკლავ“ დამფუძნებელი ზვიად კუპრავას ორგანიზებულ აქციას გაემიჯნა და ვაკის პარკში აქციას შეუერთდა, სადაც სარალიძეს მხარდაჭერას პოლიტიკოსების გარეშე უცხადებენ. 

31 მაისს ხორავას ქუჩაზე მოზარდების მკვლელობის საქმეზე მოსამართლემ განაჩენი გამოაცხადა.  პროკურატურა განაჩენს სააპელაციოში გაასაჩივრებს.  

31 მაისვე, დღის პირველ ნახევარში, საგანგებო პრესკონფერენცია გამართა მთავარმა პროკურორმაც და ამ საქმეზე პროკურატურის პოზიცია კიდევ ერთხელ განმარტა.  დღის მეორე ნახევარში კი მთავარმა პროკურორმა თანამდებობა დატოვა.

მკვლელობის საქმეზე პარლამენტმა სპეციალური საგამოძიებო კომისია შექმნა.

საგანგებო ბრიფინგი გამართა პრემიერმინისტრმა გიორგი კვირიკაშვილმა, რომელმაც განაცხადა, რომ ხორავას ქუჩაზე მკვლელობის საქმეს შინაგან საქმეთა სამინისტრო დაიბრუნებს გამოძიებაში და მას პირადად გიორგი გახარია უხელმძღვანელებს.

2017 წლის 1 დეკემბერს თბილისის ცენტრში, ვერაზე ორი არასრულწლოვანი დავით სარალიძე და ლევან დადუნაშვილი დაჭრეს. ერთი მოზარდი საავადმყოფოში მიყვანამდე გარდაიცვალა. მეორე - მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა.