მთავარი პროკურორის შესარჩევად წულუკიანმა საჯარო კონსულტაციები დაიწყო

„პროკურატურის შესახებ“ საქართველოს კანონის მე-9 პრიმა მუხლის თანახმად, საქართველოს იუსტიციის მინისტრმა, საპროკურორო საბჭოს თავმჯდომარემ, თეა წულუკიანმა მთავარი პროკურორის შესარჩევად საჯარო კონსულტაციები დაიწყო. ინფორმაციას იუსტიციის სამინისტრო ავრცელებს.

4 ივნისს არასამთავრობო ორგანიზაციებს, აკადემიურ წრეებსა და სამართლის დარგის სპეციალისტებს მიმართვა დაეგზავნათ, რომლის საფუძველზეც შესაძლებელი გახდა კანონით გათვალისწინებული წესით პროკურორობის კანდიდატების წარდგენა.

კონსულტაციებში მონაწილეობისთვის წერილი დაეგზავნათ შემდეგი ორგანიზაციების ხელმძღვანელებსა და უმაღლესი სასწავლებლების რექტორებს: „საქართველოს ადვოკატთა ასოციაცია“; ივანე ჯავახიშვილის სახელობის თბილისის სახელმწიფო უნივერსიტეტი; გრიგოლ რობაქიძის სახელობის უნივერსიტეტი; ქართულ-ამერიკული უნივერსიტეტი; საქართველოს საპატრიარქოს წმიდა ანდრია პირველწოდებულის სახელობის ქართული უნივერსიტეტი; კავკასიის უნივერსიტეტი; გურამ თავართქილაძის სასწავლო უნივერსიტეტი; თბილისის ვანო სარაჯიშვილის სახელობის სახელმწიფო კონსერვატორია; თბილისის აპოლონ ქუთათელაძის სახელობის სახელმწიფო სამხატვრო აკადემია; საქართველოს ტექნიკური უნივერსიტეტი; სოხუმის სახელმწიფო უნივერსიტეტი; თბილისის სახელმწიფო სამედიცინო უნივერსიტეტი; ილიას სახელმწიფო უნივერსიტეტი; აკაკი წერეთლის სახელმწიფო უნივერსიტეტი; ბათუმის შოთა რუსთაველის სახელმწიფო უნივერსიტეტი;  სამცხე-ჯავახეთის სახელმწიფო უნივერსიტეტი; იაკობ გოგებაშვილის სახელობის თელავის სახელმწიფო უნივერსიტეტი; გორის სახელმწიფო სასწავლო უნივერსიტეტი; შოთა მესხიას ზუგდიდის სახელმწიფო სასწავლო უნივერსიტეტი; დავით აღმაშენებლის სახელობის საქართველოს ეროვნული თავდაცვის აკადემია; „ადამიანის უფლებათა პრიორიტეტი“; „კონსტიტუციის 42-ე მუხლი“; „სამოქალაქო ჩართულობის ცენტრი“; „ციხის საერთაშორისო რეფორმა“; „ადვოკატთა და იურისტთა საერთაშორისო ობსერვატორია“; „საერთაშორისო გამჭვირვალობა − საქართველო“ ; „საქართველოს ახალგაზრდა იურისტთა ასოციაცია; „საქართველოს ევროპული არჩევანი“; „საქართველოს მოსამართლეთა ერთობა“; „ადამიანის უფლებების სწავლებისა და მონიტორინგის ცენტრი“ (EMC); „საქართველოს ადვოკატები დამოუკიდებელი პროფესიისათვის“, და სხვ.

საპროკურორო საბჭო მთავარი პროკურორობის კანდიდატს მეორედ ირჩევს. პირველად არჩევნები 2015 წელს გაიმართა. საპროკურორო საბჭოსათვის წარსადგენი კანდიდატურების შესარჩევად იუსტიციის მინისტრი ერთთვიან კონსულტაციებს აწარმოებდა სამოქალაქო საზოგადოებასთან, არასამთავრობო ორგანიზაციებთან, ექსპერტებსა და აკადემიურ წრეებთან. დასახელებულ კანდიდატებთან თეა წულუკიანმა გაცნობითი შეხვედრები გამართა და 18 ნოემბერს სამი კანდიდატურა დაასახელა – ვლადიმერ გაბრიჩიძე, ნანა რევაზიშვილი და ირაკლი შოთაძე.  საპროკურორო საბჭომ არჩევნების გზით მთავარ პროკურორად ირაკლი შოთაძის კანდიდატურა დაამტკიცა და დაუყოვნებლივ წარუდგინა მთავრობას. მთავრობის თანხმობის შემდეგ, კანდიდატურა საქართველოს პარლამენტს წარედგინა. 2015 წლის 27 ნოემბერს საქართველოს პარლამენტმა ირაკლი შოთაძე მთავარი პროკურორის პოსტზე დაამტკიცა.

31 მაისს მთავარი პროკურორი თანამდებობიდან გადადგა. ირაკლი შოთაძის განცხადებით, მას არ უღირს ზაზა სარალიძის შვილის სიცოცხლედ საკუთარი თანამდებობა.

ირაკლი შოთაძე საქართველოს მთავარ პროკურორად 2015 წლის 19 ნოემბრიდან მუშაობდა. 2013 წელს ფინანსთა სამინისტროს საგამოძიებო დეპარტამენტის უფროსი იყო, 2013-2015 წლებში კი - საქართველოს მთავარი პროკურორის პირველი მოადგილე.