არასამთავრობოები პროკურორის შესარჩევ პროცესში მონაწილეობაზე უარს აცხადებენ

მთავარი პროკურორის შესარჩევ პროცესთან დაკავშირებით, არასამთავრობო ორგანიზაციებმა პრესკონფერენცია გამართეს, რომელზეც განაცხადეს, რომ პროცესში არ ჩაერთვებიან. ამის შესახებ სააგენტო "ინტერპრესნიუსი" წერს.

"ჩვენ თეა წულუკიანს კონსულტაციების მაგიდასთან არ დავუსხდებით და უარს ვამბობთ ამ პროცესში მონაწილეობაზე", - განაცხადა ეკა გიგაურმა, „საერთაშორისო გამჭვირვალობა-საქართველოს“ ხელმძღვანელმა.

"მიზეზი არის ის, რომ წლების განმავლობაში ამ ქვეყანაში მართლმსაჯულების რეფორმა იყო აბსოლუტურად არაეფექტური. ზუსტად ამიტომ, ჩვენ ამ პერიოდის განმავლობაში ვსაუბრობთ იმ პრობლემებზე, რომელიც გვაქვს სასამართლოში, პროკურატურაში, ჩვენ ვსაუბრობთ ძალიან ბევრ გამოუძიებელ საქმეზე და ვსაუბრობთ ადამიანის უფლებების დარღვევის კონკრეტულ შემთხვევებზე. ამის მიზეზი არის ზუსტად ის, რომ აქამდე არ არსებობდა პოლიტიკური ნება იმისა, რომ სახელმწიფოში ჩატარებულიყო ეფექტური მართლმსაჯულების რეფორმა", - განაცხადა გიგაურმა.

არასამთავრობოები პრემიერმინისტრს მიმართავენ, გადააყენოს თანამდებობიდან იუსტიციის მინისტრი თეა წულუკიანი.

"იმიტომ, რომ მან წლების განმავლობაში ვერ გაართვა თავი იმ მნიშვნელოვან მისიას, რასაც მართლმსაჯულების სექტორში რეფორმა ჰქვია. ჩვენ ვფიქრობთ, რომ ამ პირობების გათვალისწინებით, არ არის სწორი თუკი კონსულტაციაში ჩავერთვებით მასთან მთავარი პროკურორის არჩევის პროცესში. ჩვენ ვფიქრობთ, რომ ამ შემთხვევაში ეს ადამიანი არ იქნება მიმართული იმისკენ, რომ მართლაც დამოუკიდებელი, მიუკერძოებელი და ღირსეული მთავარი პროკურორი აარჩიოს. ამიტომ, ჩვენ მას კონსულტაციების მაგიდასთან არ დავუსხდებით და უარს ვამბობთ ამ პროცესში მონაწილეობაზე,"- განაცხადა ეკა გიგაურმა.

იუსტიციის მინისტრმა, საპროკურორო საბჭოს თავმჯდომარემ, თეა წულუკიანმა მთავარი პროკურორის შესარჩევად საჯარო კონსულტაციები  4 ივნისს დაიწყო. კონსულტაციებში მონაწილეობისთვის წერილი დაეგზავნათ ორგანიზაციების ხელმძღვანელებსა და უმაღლესი სასწავლებლების რექტორებს.

31 მაისს მთავარი პროკურორი თანამდებობიდან გადადგა. ირაკლი შოთაძის განცხადებით, მას არ უღირს ზაზა სარალიძის შვილის სიცოცხლედ საკუთარი თანამდებობა.

ირაკლი შოთაძე საქართველოს მთავარ პროკურორად 2015 წლის 19 ნოემბრიდან მუშაობდა. 2013 წელს ფინანსთა სამინისტროს საგამოძიებო დეპარტამენტის უფროსი იყო, 2013-2015 წლებში კი - საქართველოს მთავარი პროკურორის პირველი მოადგილე.