კვირიკაშვილი სარალიძეს: შევდივარ თქვენს მდგომარეობაში

მთავრობის ადმინისტრაცია პრემიერმინისტრ გიორგი კვირიკაშვილსა და ზაზა სარალიძეს შორის შეხვედრის შესახებ ოფიციალურ ინფორმაციას ავრცელებს. 

როგორც კვირიკაშვილმა ზაზა სარალიძეს უთხრა, ის სწუხს, რომ აქამდე არ მიეცა საშუალება მას მშვიდ ვითარებაში შეხვედროდა.

"კიდევ ერთხელ მინდა, მოგისამძიმროთ. ღმერთის წინაშე მინდა ვთქვა, რომ აბსოლუტურად შევდივარ თქვენს მდგომარეობაში და ეს ჩემთვის ისეთივე ტრაგედიაა, როგორც ნებისმიერი ადამიანისთვის, ვინც თქვენი ოჯახების უბედურებას უყურებს“, – განაცხადა გიორგი კვირიკაშვილმა.

პრემიერ-მინისტრმა მოისმინა ის კითხვები, რომლებიც სარალიძეების ოჯახს მათი შვილის მკვლელობის საქმესთან დაკავშირებით აქვს და აღნიშნა, რომ ამ თემაზე გარკვეული ინფორმაცია 1-ელ ივნისს, სახალხო დამცველთან შეხვედრისასაც მიიღო.

სარალიძის შემდეგ გიორგი კვირიკაშვილი ლევან დადუნაშვილის მშობლებს შეხვდა. პრემიერმინისტრმა დავით დადუნაშვილს კიდევ ერთხელ მიუსამძიმრა და აღნიშნა, რომ სახელმწიფო გააკეთებს ყველაფერს, რათა ხორავას ქუჩაზე მომხდარი მკვლელობა სრულყოფილად იყოს გამოძიებული და დამნაშავეებმა კანონის შესაბამისად აგონ პასუხი.

თავდაპირველად კი პრემიერი მალხაზ მაჩალიკაშვილს შეხვდა. „მე არ მინდა, გქონდეთ შეგრძნება, რომ თქვენ სახელმწიფომ გაგრიყათ და უარს ამბობს კომუნიკაციაზე. პირადად თქვენგან არ ყოფილა ჩემთან შეხვედრის მოთხოვნა, თორემ ეს შეხვედრა აქამდეც შედგებოდა, ამ აქციების გარეშე. მინდა, თქვენ, თქვენს ოჯახს და მთლიანად პანკისელებს კიდევ ერთხელ სამძიმარი გამოგიცხადოთ“, - განაცხადა გიორგი კვირიკაშვილმა შეხვედრაზე.

სარალიძემ შეხვედრის დასრულების შემდეგ განაცხადა, რომ ხელისუფლებას 10 ივნისამდე მისცა ვადა. 

ხორავას ქუჩაზე მოზარდების მკვლელობის საქმეზე მოსამართლემ განაჩენი გამოაცხადა. ბრალდება და დაცვის მხარე განაჩენს სააპელაციოში გაასაჩივრებს.

2017 წლის 1 დეკემბერს თბილისის ცენტრში, ვერაზე ორი არასრულწლოვანი დავით სარალიძე და ლევან დადუნაშვილი დაჭრეს. ერთი მოზარდი საავადმყოფოში მიყვანამდე გარდაიცვალა. მეორე - მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა.