ხელოვნების სფეროს წარმომადგენლები მეტროს მემანქანეებს სოლიდარობას უცხადებენ

სახელოვნებო და საზოგადოებრივი ჯგუფების წარმომადგენლები მეტროს მემანქანეებს სოლიდარობას უცხადებენ. მათ ამის შესახებ განცხადებაც გაავრცელეს. 

„ჩვენ, მწერლები, პოეტები, მთარგმნელები და ხელოვნების სფეროში მომუშავე ადამიანები, სოლიდარობას ვუცხადებთ თბილისის მეტროს თანამშრომლებს.

თბილისის მეტროპოლიტენის თანამშრომლები 3 ივნისიდან იყენებენ შრომის უფლებებისთვის ბრძოლის უმთავრეს იარაღს - საპროტესტო შიმშილობასა და გაფიცვას. მეტროს თანამშრომლების სამართლიანი მოთხოვნების განხილვის ნაცვლად, თბილისის მერია ცდილობს, ქალაქის სატრანსპორტო კოლაფსზე პასუხისმგებლობა მეტროს მემანქანეებს დააკისროს. გაფიცვის დაწყების შემდეგ, ჩვენ ვისმენთ, ქალაქის მერისა და სხვა მაღალი თანამდებობის პირების მუქარასა და გაფიცვის კონსტიტუციური უფლების დაკნინებას. ქალაქის ხელმძღვანელობის განცხადებები და გადაწყვეტილებები აგრძელებს ქვეყნის საჯარო ცხოვრების ყველა სფეროში ფესვგადგმულ ანტისოციალურ პოლიტიკას.

ჩვენ გვჯერა, რომ საქართველოს მოქალაქეებს მათივე შრომის თანაზომიერი, ღირსეული ანაზღაურება უნდა ჰქონდეთ. ამასთან, დაუშვებლად მიგვაჩნია მერიის მიდგომა, მეტროში დასაქმებულთა მცირე ანაზღაურება მუნიციპალიტეტის სხვადასხვა სფეროში მომუშავე ადამიანთა კიდევ უფრო მცირე ხელფასით გაამართლოს. ეს მიდგომა აჩვენებს ქალაქის ხელმძღვანელობის უუნარობას, შექმნას მოქალაქეთათვის ღირსეული საცხოვრებელი გარემო და დაავალდებულოს სხვა კერძო კომპანიები, შრომის პირობების დაცვა უზრუნველყონ.

ამ განცხადების ხელმომწერებს შორის, ვართ ისეთებიც, რომელთა შრომითი ანაზღაურება შესაძლოა, მეტროს მემანქანეთა ხელფასზე ნაკლები იყოს. თუმცა, ეს ხელს არ გვიშლის, ვიყოთ სოლიდარულები მათ მიმართ.

ჩვენ გვჯერა, რომ ამ ბრძოლაში მეტროს მემანქანეთა გამარჯვება ყველა მშრომელისა და დასაქმებულისთვის სასიკეთოა“ - წერია განცხადებაში.

განცხადების ხელმომწერები არიან: თეონა დოლენჯაშვილი, პაატა შამუგია, ლაშა ბუღაძე, ნინო სადღობელაშვილი, მაკა ლდოკონენი, ირინე ჭოღოშვილი, ზაალ ანდრონიკაშვილი, დიანა ანფიმიადი, ნინო ბექიშვილი, ბელა ჩეკურიშვილი, ერეკლე დეისაძე, ზვიად რატიანი, ირაკლი ლომოური, ბექა ქურხული, ლაშა ბაქრაძე, დალილა გოგია, ირაკლი კაკაბაძე, ნატო ინგოროყვა, ლევან ბერძენიშვილი, გიორგი მაისურაძე, დარეჯან კიკოლიაშვილი, დავით გაბუნია, ნინო სურამელაშვილი, მაგდა გურული.

მეტროს მემანქანეები 4 ივნისის დილიდან გაიფიცნენ, რის გამოც ამ დროისთვის ყველა მეტროსადგური გაჩერებულია. მეტროსადგურების მუშაობის აღდგენამდე ავტობუსებით მგზავრობა უფასო იქნება.

თბილისის მეტროპოლიტენის მემანქანეები საათობრივი ანაზღაურების გაზრდას 2 აპრილიდან ითხოვენ. თბილისის მერმა არაერთხელ განაცხადა, რომ მეტროპოლიტენის მემანქანეებს ხელფასს ვერ გაუზრდის.

4 ივნისს, კახა კალაძემ მეტროს მემანქანეების ხელფასი გაასაჯაროვა და აღნიშნა, რომ მათი ანაზღაურება პატრულის, მაშველის, მეხანძრის, სასწრაფო ბრიგადის თანამშრომლის ხელფასებს აღემატება.