რა არის საჭირო ომის ვეტერანთა რეაბილიტაციის ხელშეწყობის პროგრამით სარგებლობისთვის

ომის ვეტერანთა რეაბილიტაციის ხელშეწყობის ქვეპროგრამით გათვალისწინებული მომსახურება ომის ვეტერანებს სთავაზობს ექიმ-სპეციალისტ(ებ)თან კონსულტირებას, ფიზიოთერაპიული და ლაბორატორიულ-ინსტრუმენტული კვლევების ჩატარებას, ბალნეოლოგიური პროცედურების ჩატარებას, სამკურნალო ფიზკულტურისა და მანუალური თერაპიის პროცედურების ჩატარებას. ამის შესახებ ჯანდაცვის სამინისტროს სოციალური მომსახურების სააგენტოს ვებგვერდზე ვკითხულობთ.

ომის ვეტერანთა რეაბილიტაციის ხელშეწყობის პროგრამით სარგებლობა შეუძლიათ შეზღუდული შესაძლებლობის სტატუსის მქონე ან ხანდაზმულ (ქალები - 60 წლიდან, კაცები - 65 წლიდან) ომის მონაწილეებს.

ომის ვეტერანთა რეაბილიტაციის მომსახურების მისაღებად საჭიროა ბენეფიციარი (ან მისი კანონიერი წარმომადგენელი) მიმართავს მომსახურების მიმწოდებელ ორგანიზაციას (შპს „თბილისის ბალნეოლოგიური კურორტი, საქართველოს კურორტოლოგიის, ფიზიოთერაპიისა და სამკურნალო ს/პ ცენტრი"), განცხადებით და შემდეგი საბუთებით:

პირადობის დამადასტურებელი საბუთი (მოქალაქის პირადობის მოწმობა ან პასპორტი) და მისი ასლი,

სააგენტოს მიერ გაცემული ცნობა, რომ პირს მიმდინარე წელს არ უსარგებლია ამ ქვეპროგრამით გათვალისწინებული მომსახურებით (ინდივიდუალური კურსით),

შშმ პირის სტატუსის დამადასტურებელი საბუთის ასლი (შშმ პირის შემთხვევაში),

ომის მონაწილის სტატუსის დამადასტურებელი დოკუმენტი ან ცნობა.

ომის მონაწილეთა რეაბილიტაციის ხელშეწყობის ქვეპროგრამაში მონაწილეობის მისაღებად ომის ვეტერანები რეგისტრირებულნი უნდა იყვნენ სსიპ - ვეტერანების საქმეთა სახელმწიფო სამსახურის საინფორმაციო ბაზაში.

2018 წლის განმავლობაში, ერთ პირზე გათვალისწინებულია არაუმეტეს ერთი ინდივიდუალური კურსის ღირებულების დაფინანსება.

ინდივიდუალური კურსით გათვალისწინებული მომსახურებების ღირებულების ასანაზღაურებლად გამოიყენება არამატერიალიზებული ვაუჩერი. ამასთან, ანაზღაურება ხორციელდება ფაქტობრივი ხარჯის მიხედვით, არა უმეტეს 250 ლარის ოდენობით.

საქართველოში ომის ვეტერანები სხვადსახვა ტიპის სოციალური და ფინანსური შეღავათებით სარგებლობენ.

ამასთან. ცნობილია, რომ მეორე მსოფლიო ომის მონაწილეები 2018 წლის პირველი ივნისიდან ყოველთვიურად, პენსიასთან ერთად სოციალური დახმარების სახით, 180 ლარს მიიღებენ. დადგენილება დღეს 28 მაისს საკანონმდებლო მაცნეში გამოქვეყნდა და 2018 წლის პირველი ივნისიდან ამოქმედდა.