ავარიის დროს დაშავებული ბავშვი: მძღოლი ამუხრუჭებდა, მაგრამ მანქანა არ ჩერდებოდა

გომბორზე, ავარიის დროს დაშავებული ერთ-ერთი ბავშვი შემთხვევის დეტალებს იხსენებს. ამის შესახებ სააგენტო "ინტერპრესნიუსი" წერს.

როგორც მოსწავლე ამბობს, ავარიის დროს მძღოლმა ყვირილი დაიწყო და იძახდა დავიღუპეთო, ჩვენც პანიკაში ვიყავით.

„მძღოლი ამუხრუჭებდა, მაგრამ მანქანა არ ჩერდებოდა. ყველას შეგვეშინდა. ავარიისას ერთი ბავშვი დაიღუპა და დედა მეუბნებოდა - მისკენ არ გამეხედა, ძალიან შეგვეშინდა. ორი „მარშრუტკით“ ვიყავით. ყველა საავადმყოფოში წევს, ჩემს გარდა“, - განაცხადა დაშავებულმა მოსწავლემ, რომელსაც პირველადი სამედიცინო დახმარება კლინიკაში ჩაუტარდა.

დაშავებულების სანახავად თელავში ჩავიდნენ შინაგან საქმეთა და ჯანდაცვის მინისტრები.

თელავის რეფერალურ საავადმყოფოში ავარიის შედეგად დაშავებული 21 მგზავრი, მათ შორის 12 ბავშვია. ერთი დაშავებული თბილისში გადაჰყავთ. გავრცელებული ინფორმაციით, ქალი ავარიის დროს გარდაცვლილი ბავშვის დედაა. ქალს მრავლობითი მოტეხილობები აღენიშნება.

გომბორის გზაზე მიკროავტობუსი, რომელსაც სკოლის მოსწავლეები ექსკურსიაზე მიჰყავდა, გზიდან ხევში გადავარდა. დაიღუპა ოთხი ადამიანი, მათ შორის ერთი ბავშვი.

მომხდარზე გამოძიება 276-ე მუხლის მე-7 ნაწილით დაიწყო.