ზაზა სარალიძე სუბელიანის მეუღლისა და შვილის დაკავებასაც ითხოვს

თბილისში, ხორავას ქუჩაზე მოკლული დავით სარალიძის მამა, ზაზა სარალიძე მოუწოდებს შინაგან საქმეთა სამინისტროს, დააკავონ მირზა სუბელიანის მეუღლე და შვილი, რადგან მათაც იცოდნენ საქმის დეტალები და ამის შესახებ ძალოვან უწყებას არ აცნობეს. მისივე თქმით, მირზა სუბელიანს ბრალი უნდა წაუყენონ არა მხოლოდ დანაშაულის დაფარვისთვის, არამედ საქმეში უხეშად ჩარევისთვისაც. 

„მივესალმები შსს-ს მიერ დღეს გადადგმულ ნაბიჯს, მაგრამ სუბელიანისთვის წაყენებული ბრალდება არანაირად არაა დამაკმაყოფილებელი, იმის გათვალისწინებით, რა წვლილიც მას მიუძღვის ამ საქმეში. მოგეხსენებათ, მას ბრალი შეუტყობინებლობაზე წარუდგინეს, მაგრამ ბრალი არ წაუყენებიათ ამ საქმეში უხეშად ჩარევისთვის. გარდა ამისა, როცა სუბელიანი კალანდიების ოჯახში მივიდა, იქ მანამდე მისი მეუღლე და შვილიც იმყოფებოდნენ. შვილი, რომელიც რამდენიმე საათში სუბელიანმა საგამოძიებო უწყებაში წარადგინა, რათა მას ჩვენება მიეცა. გამოდის, რომ დანაშაული მისმა შვილმა და მეუღლემაც დაფარეს. გარდა ამისა, მისი შვილი არაა დაკავებული ამ საქმის ორგანიზებისთვის. მეუღლემ კი, ასევე კარგად იცოდა, ვინ იყო მკვლელი. ამის შესახებ იცოდა მ.კ-ს დედამაც. მან იცოდა, სადაც იყო მკვლელი. როცა მე ეს პროკურატურაში ვთქვი, მითხრეს ასე: „კარგი რა, მთელ ოჯახს ხომ არ დავიჭერთ?". რას ჰქვია, ვერ დაიჭერ? ვინც დამნაშავეა, ყველა დასაჭერია.

მირზა სუბელიანის დაკავება ჩემთვის იყო გადმოგდებული საკენკი და უმეცარი ნაბიჯი, რათა მე გავჩერდე. მე თავიდანვე მქონდა საუბარი როგორც დანაშაულის დამფარავებსა და ორგანიზატორებზე, ისე საქმის პროკურორებზე, რომლებიც ასევე, პასუხისგებაში არიან მისაცემი“-თქვა სარალიძემ.

ზაზა სარალიძის ადვოკატის, ნესტან ლონდარიძის თქმით კი, გამოძიებამ ახლა პასუხი უნდა გასცეს მთავარ კითხვას, - რა გავლენა მოახდინა სუბელიანმა გამოძიების მსვლელობაზე. „ამ კუთხით, დანაშაულის ნიშნები ნამდვილად იკვეთება. პასუხგაუცემელია კითხვა, რა იყო სუბელიანის უმთავრესი ინტერესი. მხოლოდ ის, რომ შვილის კლასელი დაეფარა? ამ კითხვებზე პასუხის გაცემა იძლევა საშუალებას, გაირკვეს, რა მოხდა ხორავას ქუჩაზე“ - თქვა ლონდარიძემ.

ხორავას ქუჩაზე მომხდარი მკვლელობის საქმეზე შსს-მ ცოტა ხნის წინ მირზა სუბელიანი დააკავა,  8 ივნისს კი - მერაბ მორჩაძე.

მათ გამოძიება მოწმეზე ზემოქმედებასა და დანაშაულის შეუტყობინებლობას ედავება.

მირზა სუბელიანი საგამოძიებო ორგანოში დღეს უკვე მესამედ მიიყვანეს. ბოლოს, ორი დღის წინ, 9-საათიანი დაკითხვის შემდეგ, სუბელიანმა განაცხადა, რომ ის არ გამორიცხავდა მის მიმართ ბრალის წარდგენას.

2017 წლის დეკემბერში, მაშინ, როცა მკვლელობა მოხდა, სუბელიანი მთავარ პროკურატურაში ადამიანური რესურსების მართვისა და განვითარების დეპარტამენტში მუშაობდა. 2017 წლის 3 დეკემბერს სუბელიანმა პროკურატურაში თანამდებობა დატოვა და ვრცელი განცხადება გაავრცელა.

3 ივნისს, შინაგან საქმეთა სამინისტროს ცენტრალური კრიმინალური პოლიციის დეპარტამენტის დირექტორმა, ვლადიმერ ბორცვაძემ თქვა, რომ მოზარდების მკვლელობის საქმეზე გარკვეული ახალი დეტალები გახდა ცნობილი.

ხორავას ქუჩაზე მოზარდების მკვლელობის საქმეზე მოსამართლის განაჩენის გამოცხადებას ზაზა სარალიძის მხარდამჭერი მასობრივი საპროტესტო აქციები მოჰყვა. აქციების პირველივე დღეს გადადგა მთავარი პროკურორი, ირაკლი შოთაძე. საქმის გამოძიება შინაგან საქმეთა სამინისტროს დაევალა, პარლამენტში კი საგამოძიებო კომისია შეიქმნა, რომლის უმრავლესობა უმცირესობის წარმომადგენლებით დაკომპლექტდა.

2017 წლის 1 დეკემბერს თბილისის ცენტრში, ვერაზე ორი არასრულწლოვანი დავით სარალიძე და ლევან დადუნაშვილი დაჭრეს. ერთი მოზარდი საავადმყოფოში მიყვანამდე გარდაიცვალა. მეორე - მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა.