ევროპარლამენტში რეზოლუციას, რომელშიც არჩილ ტატუნაშვილზეა საუბარი, დღეს უყრიან კენჭს

ევროპარლამენტის პირველ რეზოლუციას, რომელშიც არჩილ ტატუნაშვილზე იქნება საუბარი, დღეს უყრიან კენჭს. დოკუმენტში, რომელიც 20 პუნქტისგან შედგება ნათქვამია, რომ საქართველოს ტერიტორიები ოკუპირებულია და რუსეთმა ნაკისრი ვალდებულება უნდა შეასრულოს. ამის შესახებ 1tv წერს.

საპარლამენტო უმრავლესობის წევრმა, დიმიტრი ცქიტიშვილმა განაცხადა, რომ ამ საკითხზე რეზოლუციაში ორ კონტექსტშია ხაზი გასმული.

„რეზოლუციაში, რომელსაც 14 ივნისს ევროპარლამენტი დაამტკიცებს, კონკრეტული გვარებია ჩაწერილი. საუბარია ოკუპირებულ ტერიტორიებზე ოთხოზორიას, ტატუნაშვილის, ასევე ბაშარულის მკვლელობებზე. ამ მკვლელობებზე საუბარია იმ ნაწილშიც, სადაც რეზოლუცია ადამიანის უფლებების უხეშ დარღვევებზე, დისკრიმინაციაზე, გადაადგილების შეზღუდვაზე აკეთებს აქცენტს“, – განაცხადა ცქიტიშვილმა.

რეზოლუციის მიღებამდე ევროპარლამენტში დებატები გაიმართა, რომელზეც დეპუტატების უმრავლესობამ უპირობოდ დაუჭირა მხარი საქართველოს ტერიტორიულ მთლიანობას და ხაზი გაესვა რუსეთის მხრიდან აღებული ვალდებულებების დარღვევის საკითხს.

საგარეო პოლიტიკისა და უსაფრთხოების საკითხებში ევროკავშირის უმაღლესი წარმომადგენელის ფედერიკა მოგერინის  თქმით, საქართველოში 2008 წლის ომიდან ათი წლის შემდეგ ევროკავშირს არ შეუჩერებია მუშაობა მშვიდობისა და კონფლიქტის ნამდვილი გადაჭრისთვის. მისი თქმით, ევროკავშირს სპეციალური როლი აკისრია საქართველოში ევროკავშირის სადამკვირვებლო მისიის სახით, რადგან იგი  ერთადერთი საერთაშორისო სადამკვირვებლო მისიაა ადგილზე.

„ახლახან სირიის არაბულმა რესპუბლიკამ ასევე გამოაცხადა, რომ დიპლომატიურ ურთიერთობებს დაამყარებს აფხაზეთთან და სამხრეთ ოსეთთან. ჩვენ დაუყოვნებლივ დავგმეთ ეს ნაბიჯი საერთაშორისო თანამეგობრობასთან ერთად. ეს საერთაშორისო სამართლის დარღვევაა და ეს მხოლოდ გაართულებს კონფლიქტის გადაჭრის მიღწევას. ჩვენ ასევე ვგმობთ რუსეთის მიერ გადადგმულ ნაბიჯებს, რაც ემსახურება იმის კონსოლიდირებას, რასაც ის „ახალ რეალობას“ უწოდებს. ჩვენ ასევე მიუღებლად მივიჩნევთ რუსეთის სამხედრო ყოფნის გაძლიერებას სეპარატისტულ რეგიონებში და გამყოფ ხაზებზე ფიზიკური ბარიერების აგებას“, - განაცხადა საგარეო პოლიტიკისა და უსაფრთხოების საკითხებში ევროკავშირის უმაღლესმა წარმომადგენელმა.

ევროპარლამენტის გამოსვლისას ფედერიკა მოგერინიმ რუსეთს შეახსენა, რომ მსგავსი ქმედებები საერთაშორისო სამართფლის ფუნდამენტური პრინციპების დარღვევას წარმოადგენს და მიუღებელია.

„ეს მიუღებელია არა მხოლოდ იმიტომ, რომ საერთაშორისო სამართლის დარღვევას წარმოადგენს, არამედ პირველ რიგში იმიტომ, რომ გავლენას ახდენს საქართველოში და სრულიად რეგიონში მცხოვრებ მოსახლეობაზე.  ჩვენ მხარს ვუჭერთ ყველა იმ ინიციატივას, რაც ხელს შეუწყობს ნდობის აღდგენას მხარეებს შორის. ყველა ჩვენი ქმედება ამ ორ რეგიონში სრულად კოორდინირებული და დამტკიცებულია საქართველოს მთავრობის მიერ და სრულად შეესაბამება საქართველოს ჩართულობის პოლიტიკას. ჩვენი პოლიტიკა არაღიარების და აფხაზეთთან და სამხრეთ ოსეთთან ჩართულობის პოლიტიკაა, რაც ზუსტად შეესაბამება საქართველოს მთავრობის მიდგომას. ომიდან ათი წლის შემდეგ ჩვენ არ ვჩერდებით და არ გავჩერდებით ჭეშმარიტი გადაწყვეტილების მისაღწევად“, - დასძინა მან.

ევროპარლამენტის რეზოლუციას “საქართველოს ოკუპირებული ტერიტორიების შესახებ რუსული აგრესიიდან ათი წლის შემდეგ“ კენჭი დღეს 14 ივნისს ეყრება.