კობახიძე: მოკლე ინტერვალში მთავრობისთვის ნდობის ორჯერ გამოცხადებას სამართლებრივი მიზეზი აქვს

პარლამენტის თავმჯდომარის ირაკლი კობახიძის განცხადებით, პარლამენტს სამ-ოთხ კვირიან ინტერვალში ორჯერ უწევს მთავრობისთვის ნდობის გამოცხადება, ამას კი კობახიძის თქმით, სამართლებრივი მიზეზი აქვს. მის კომენტარს სააგენტო "ინტერპრესნიუსი" ავრცელებს.

კობახიძის თქმით, სამართლებრივი მიზეზი მხოლოდ იმაში მდგომარეობს, რომ პრემიერმინისტრობის კანდიდატს აქვს ერთკვირიანი ვადა მთავრობის შემადგენლობის დასახელებისათვის. კობახიძე დასძენს, რომ ერთი კვირის განმავლობაში კანონებში ცვლილებების შეტანა შესაძლებელია.

"იმისათვის, რომ განხორციელდეს მთავრობის რეორგანიზაცია, ცვლილებები უნდა შევიდეს მთავრობის შესახებ კანონში. ამისათვის საჭიროა პროექტის შემუშავება, საჭიროა მთავრობის სხდომის ჩანიშვნა, საჭიროა პროექტის ინიცირება და შემდეგ სამი მოსმენით განხილვა. კანონპროექტი მიდის პრეზიდენტთან, ბრუნდება უკან, ქვეყნდება და ასე შემდეგ. აღნიშნული პროცედურების გავლა ერთი კვირის განმავლობაში არის შეუძლებელი. მთავრობის შემადგენლეობის 1/3-ით განახლება ავტომატურ რეჟიმში მთავრობისათვის ხელახალი ნდობის გამოცხადებას იწვევს. სუფთა სამართლებრივი მიზეზია, რომ ჩვენ რამდენიმეკვირიან ინტერვალში მთავრობისთვის ნდობის ორჯერ გამოცხადება გვიწევს“, - განაცხადა კობახიძემ პარლამენტის ბიუროს სხდომაზე. 

პარლამენტის ბიუროს დღეს მთავრობის შემადგენლობა წარედგინა. საგარეო საქმეთა მინისტრის თანამდებობაზე დავით ზალკალიანი, ეკონომიკის მინისტრის თანამდებობაზე გიორგი ჩერქეზიშვილი, ფინანსთა მინისტრის თანამდებობაზე კი ნიკოლოზ გაგუაა წარდგენილი. ზალკალიანი, ჩერქეზიშვილი და გაგუა შესაბამის უწყებებში აქამდე მინისტრის მოადგილეები იყვნენ. დანარჩენი ყველა უწყების ხელმძღვანელად წარდგენილია ამ დრომდე მოქმედი მინისტრი.

მთავრობისთვის ნდობის გამოცხადება 20 ივნისს იგეგმება. 

დღეს საქართველოს პრემიერმინისტრობის კანდიდატმა, მამუკა ბახტაძემ თქვა, რომ მოსახლეობას მთავრობის შენახვა გაცილებით იაფი უნდა უჯდებოდეს, ვიდრე - ახლა. სწორედ ამიტომ მმართველი პარტიის კანდიდატი რამდენიმე უწყების გაერთიანებას გეგმავს. ახალი სტრუქტურა პარლამენტს, სავარაუდოდ, 2-3 კვირაში წარედგინება.

მამუკა ბახტაძე 14 ივნისს ქართულმა ოცნებამ პრემიერმინისტრობის კანდიდატად დაასახელა. გიორგი კვირიკაშვილმა პრემიერმინისტრის თანამდებობა 12 ივნისს დატოვა. ამის მიზეზად მან პარტიის თავმჯდომარესთან აზრთა სხვადასხვაობა დაასახელა.