საქალაქო სასამართლო ზვიად დევდარიანს ბრალდებაზე პასუხობს

თბილისის საქალაქო სასამართლო ქალთა მიმართ სექსუალურ შევიწროებაში ბრალდებულ ზვიად დევდარიანსა და მის ადვოკატ დიმიტრი გაბუნიას პასუხობს. სპეციალური განცხადება საქალაქო სასამართლოს ვებგვერდზე გავრცელდა.

თბილისის საქალაქო სასამართლოს ინფორმაციით, მათგან ინფორმაციის გაჟონვაზე, დევდარიანმა და მისმა უფლებადამცველმა ცრუ ინფორმაცია გაავრცელეს.

"ზვიად დევდარიანისა და მისი ადვოკატის დიმიტრი გაბუნიას მიერ გავრცელებული განცხადება, სასამართლოდან ინფორმაციის გაჟონვასთან დაკავშირებით, არის სიცრუე და ემსახურება საზოგადოების შეცდომაში შეყვანას. მხარეთა მიერ ვარაუდის საფუძველზე გავრცელებული ინფორმაცია და სასამართლოს ობიექტურობაში ეჭვის შეტანა, ხელს უშლის სასამართლოსადმი ნდობის ამაღლებას და მიზნად ისახავს უწყების დისკრედიტაციას.
 
ზვიად დევდარიანისა და მისი რწმუნებულის განცხადებების ქვეტექსტი, თითქოს სასამართლომ არაოფიციალურად, უკანონოდ და დარღვევით გასცა ინფორმაცია, არ შეესაბამება სინამდვილეს და არის სრული დეზინფორმაცია. სასამართლოს მხრიდან ინფორმაცია გაიცემა მხოლოდ კანონით დადგენილი ფორმითა და წესით.  
 
ზემოაღნიშნულიდან გამომდინარე, თბილისის საქალაქო სასამართლო მოუწოდებს განმცხადებლებს  მეტი ყურადღება გამოიჩინონ და დაუზუსტებელი და მცდარი ინფორმაციის გავრცელების ნაცვლად, სასამართლოს მოხელის მხრიდან კონკრეტული გადაცდომის შესახებ ინფორმაციის არსებობისას, მიმართონ შესაბამის ორგანოს,"- წერია განცხადებაში.

ზვიად დევდარიანმა თბილისის საქალაქო სასამართლოში 12 პირის წინააღმდეგ სარჩელი შეიტანა. დევდარიანი მათ ღირსებისა და პატივის შელახვას ედავება. თუმცა, სარჩელი სასამართლომ წარმოებაში არ მიიღო. ზვიად დევდარიანი აპირებს სასამართლოს მეორედ მიმართოს.

სექსუალურ შევიწროებაში დადანაშაულებულმა ზვიად დევდარიანმა 3 აპრილს განაცხადა, რომ სამართლებრივ ბრძოლას იწყებს. ადვოკატი შსს-სგან ზვიად დევდარიანის სასწრაფოდ გამოკითხვას ითხოვდა. 

დევდარიანის მიმართ გამოთქმულ ბრალდებებთან დაკავშირებით, შსს-მ 2018 წლის 23 მარტს გამოძიება სსკ-ის 151-ე პრიმა მუხლის პირველი ნაწილით დაიწყო, რაც ადევნებას გულისხმობს.

დევდარიანის მიმართ სკანდალი იმ დროს აგორდა, როდესაც მისი კანდიდატურა საზოგადოებრივი მაუწყებლის ბორდის წევრობაზე განიხილებოდა. ზვიად დევდარიანი მაშინ არასამთავრობო ორგანიზაცია „სიდას” აღმასრულებელი დირექტორი იყო.

17 მარტს „ქალთა მოძრაობამ” გაავრცელა განცხადება, სადაც საუბარი იყო, რომ ზვიად დევდარიანი მხილებულია სექსუალური შევიწროების ათამდე შემთხვევაში. ამის შემდეგ მან საზოგადოებრივი მაუწყებლის ბორდის წევრობაზე თავისი კანდიდატურა მოხსნა, მოგვიანებით კი ზვიად დევდარიანმა ორგანიზაცია „სიდა“ დატოვა.

ომბუდსმენმა ნინო ლომჯარიამ განაცხადა, რომ მან ამ ფაქტების შესახებ არაფერი იცოდა. 

18 მარტს ნინო ლომჯარია „ქალთა მოძრაობის“ წარმომადგენლებს და იმ პირებს შეხვდა, რომლებიც ზვიად დევდარიანის მხრიდან შესაძლო სექსუალური შევიწროების ფაქტებზე საუბრობენ. არასამთავრობო ორგანიზაციებმა გაავრცელეს განცხადებები, რომლითაც სავარაუდო სექსუალურ შევიწროებაზე სათანადო რეაგირებას მოითხოვდნენ.