ადვოკატი შსს-სგან ზვიად დევდარიანის სასწრაფოდ გამოკითხვას ითხოვს

ზვიად დევდარიანის ადვოკატი დიმიტრი გაბუნია ფიქრობს, რომ კონკრეტულმა ჯგუფებმა ზვიად დევდარიანის წინააღმდეგ კამპანია ააგორეს, რომელიც საზოგადოებრივი მაუწყებლის სამეურვეო საბჭოს წევრად მის შესაძლო არჩევას უკავშირდებოდა. ამის შესახებ მან პრესკოფერენციაზე თქვა. ინფორმაციას 1tv ავრცელებს.

ადვოკატმა კონკრეტიკისგან თავი შეიკავა და აღნიშნა, რომ საქმის აღძვრის მოთხოვნით, ხვალ მიმართავს პროკურატურას.

“ეს ადამიანი მოძალადედ გამოაცხადეს. მეტსაც გეტყვით, როდესაც მისი უფროსი შვილი გავიდა ეზოში, უთხრეს, იცით, რა არის მამაშენი? ასეთია თურმე, პატარა ბავშვებზეა საუბარი, ვინ აგებს პასუხს ასეთი ტიპის განცხადებაზე? როდესაც ხელში გიჭირავს მტკიცებულება გამოძიებიდან გამომდინარე, რომ ზვიად დევდარიანი არის მოძალადე, გაქვს უფლება გააკეთო განცხადება. ხვალ-ზეგ, მე ან თქვენ დაზღვეული ვართ მსგავსი ტიპის შანტაჟისგან? ან ჩვენი შვილები არიან დაზღვეული? ბავშვებმა რა დააშავეს? აქ უცებ წარმოიშობა შეკითხვა, რომ მაშინ ეფიქრა ზვიად დევდარიანს რომ როცა რა? რას აკეთებდა ისეთს, რომელსაც ნებისმიერი ჩვენგანი არ აკეთებს? ზოგადად ვამბობ, მიმოწერაზეა საუბარი. თუ ავკრძალოთ ქვეყანაში პირადი მიმოწერა და კომუნიკაცია. სად გადის ზღვარი დანაშაულსა და კერძო პრივატულ ურთიერთობებს შორის, ეს არის დასადგენი და არა ის, რომ ზვიად დევდარიანი გამართლდება თუ გამტყუნდება. ამას ფართო ხასიათი აქვს და ეს არ დამთავრდება ამით. მე ვარ ზვიად დევდარიანის ადვოკატი და ვაპირებ, მისი კანონით გათვალისწინებული უფლებები იყოს დაცული. ერთხელ და სამუდამოდ დამკვიდრდეს დევდარიანის სახით ის პრეცედენტი, რომ ჩვენ ვიცოდეთ, რა შეიძლება, რა არ შეიძლება და როგორ უნდა გავაკეთოთ. ამ ადამიანის რეაბილიტაცია უნდა მოხდეს”, – განაცხდა გაბუნიამ.

დიმიტრი გაბუნიას შეფასებით, მომხდარი არ არის მხოლოდ ზვიად დევდარიანის ან მისი ოჯახის უფლებების დაცვა, არამედ  ამით წითელი ხაზი უნდა გაივლოს შანტაჟს, მუქარასა და შესაძლო დანაშაულებრივ ქმედებას შორის.

ადვოკატი მიმართავს შინაგან საქმეთა სამინისტროს, დაუყოვნებლივ  დაიბარონ მისი დაცვის ქვეშ მყოფი საგამოძიებო უწყებაში.

„ჩვენ მივმართავთ შინაგან საქმეთა სამინისტროს, რომელმაც ფაქტზე ადევნების მუხლით აღძრა საქმე, დაუყონებლივ მოგვიწვიოს საგამოძიებო უწყებაში თუნდაც დღეს, თუნდაც ხვალ,  ჩვენ მზად ვართ გასაუბრებისთვის, ნებისმიერი სამართლებრივი პროცედურისთვის, რათა დავასაბუთოთ ჩვენი პოზიცია. საკმაო ხანია გასული, რაც ფაქტზე საქმეა აღძრული და მოთმინებით ველოდებოდით, რომ გამოჩნდებოდნენ კონკრეტული სუბიექტები, რომლებიც მიმართავდნენ განცხადებით მათი ე.წ. შელახული უფლებების დაცვის მოთხოვნით“, – განაცხადა გაბუნიამ.

ორგანიზაცია CIDA-ს ყოფილი დირექტორი, სექსუალურ ძალადობაში დადანაშაულებული ზვიად დევდარიანი სამართლებრივ ბრძოლას იწყებს. მან ადვოკატთან ერთად პრესკონფერენცია გამართა.

ზვიად დევდარიანის მიმართ გამოთქმულ ბრალდებებთან დაკავშირებით, შსს-მ 2018 წლის 23 მარტს გამოძიება სსკ-ის 151-ე პრიმა მუხლის პირველი ნაწილით დაიწყო, რაც ადევნებას გულისხმობს.

17 მარტს ინტერნეტში გამოქვეყნდა 4 ქალის ნაამბობი, რომლებმაც ზვიად დევდარიანი სექსუალურ შევიწროებაში დაადანაშაულეს. მანამდე კი დევდარიანი სექსუალურ ძალადობაში ქალთა მოძრაობამ დაადანაშაულა და სახალხო დამცველს პარლამენტიდან მისი კანდიდატურის გამოწვევა სთხოვა. დევდარიანი საზოგადოებრივი მაუწყებლის მეურვეთა კონკურსს თავად გამოეთიშა.

ამ სკანდალის გამო, 22 მარტს ზვიად დევდარიანმა ორგანიზაცია CIDA-ს ხელმძღვანელის თანამდებობა დატოვა.