რა კეთდება და რა იგეგმება სამომავლოდ ეროვნულ ბოტანიკურ ბაღში

საქართველოს ეროვნულ ბოტანიკურ ბაღში ინფრასტრუქტურული პროექტები სხვადასხვა მიმართულებით მიმდინარეობს. თბილისის მერიის ცნობით, დაწყებულია ბოტანიკური ბაღის ცენტრალურ ნაწილში მდებარე სკვერის რეკონსტრუქცია და ახალი ადაპტირებული საპირფარეშოს მოწყობა, რომელთა ღირებულება ჯამში 179 600 ლარია. პროექტები მიმდინარე წლის სექტემბერში დასრულდება. 

მერიის ინფორმაციით, ორ კვირაში ბოტანიკური ბაღის ცენტრალურ ტურისტულ მარშრუტზე დეკორატიული მოაჯირებისა და მდინარის ხეობის საყრდენი კედლის მოწყობა დასრულდება, რომლის ღირებულებაც 87 000 ლარია.

ასევე, ორ კვირაში დასრულდება სოლოლაკის ხეივნისა და ბოტანიკური ბაღის ტერიტორიის დამაკავშირებელი კიბეების მოწყობის სამუშაოების პირველი ეტაპი, რომლისთვისაც 29 500 ლარია გამოყოფილი. 

ასევე მიმდინარეობს ერთ-ერთი ცენტრალური მარშრუტისა და აზერბაიჯანელ მოღვაწეთა პანთეონს შორის დამაკავშირებელი გზის საფარის აღდგენა.

თბილისის მერიის ცნობით, ორ კვირაში ბოტანიკური ბაღის ახალი ადმინისტრაციული და ლაბორატორიული კორპუსის ესკიზისა და შესაბამისი პროექტის შესყიდვის მიზნით კონკურსი, ხოლო ერთი თვის ვადაში, საერთაშორისო ბოტანიკური ბაღის ლანდშაფტური განვითარების გენერალური გეგმის შექმნის მიზნით ტენდერი გამოცხადდება.

მერიის ინფორმაციით, დედაქალაქის მიწათსარგებლობის ახალ გენერალურ გეგმაში გათვალისწინებული იქნება ბაღის, როგორც კულტურული მემკვიდრეობის ძეგლის თავისებურებები. 

თბილისის მერიაში აცხადებენ, რომ ბოტანიკური ბაღის განვითარების მიზნით, წლის ბოლომდე არაერთი პროექტი იგეგმება, რომელთა შორის ბონსაის საგამოფენო სივრცის მოწყობაც არის. დედაქალაქის მერიის დაფინანსებით, ბოტანიკური ბაღის კოლექციაში ბონსაის 15-მდე ეგზემპლარი უკვე შეტანილია.