მცირე მთავრობის კონცეფციას მხარი 6-დან 5-მა კომიტეტმა უკვე დაუჭირა

მთავრობის სტრუქტურული ცვლილებებს პარლამენტში მწვავე კამათის ფონზე განიხილავენ.

ე.წ. მცირე მთავრობის კონცეფციას მხარი უკვე დაუჭირა 5-მა კომიტეტმა, დარჩა მხოლოდ იურიდიულ საკითხთა კომიტეტი, რომელიც ამ საკითხში წამყვანი კომიტეტია. იურიდიულ საკითხთა კომიტეტში ცვლილებების განხილვა მიმდინარეობს.

ერთ-ერთ საკომიტეტო სხდომაზე განსაკუთრებული ხმაური ზურაბ ჭიაბერაშვილის დასმულ შეკთხვას მოჰყვა. ევროპული საქართველოს წევრს მიაჩნია, რომ მხოლოდ სახელწოდებები იცვლება და არა შინაარსი.

"მთავრობის წევრები და პრემიერ-მინისტრი მცირე მთავრობის არასწორ განმარტებას აკეთებენ, თითქოს ეს არის ადმინისტრაციული ხარჯის შეფარდება მშპ-სთან. მცირე მთავრობა არის სამთავრობო ხარჯების შეფარდება მშპ-სთან. ამ თვალსაზრისით, ისეთი ქვეყნები რომ ავიღოთ, როგორც აშშ-ია, სამთავრობო ხარჯი შეადგენს 22.7%-ს, გერმანიაში 27.9%-ს. ცუდი მაგალითი არის ევროკავშირიდან საბერძნეთი, სადაც 48.8%-ია. ზოგადად, ეკონომისტები ამბობენ, რომ რაც უფრო მცირეა მთავრობა, ეკონომიკური ზრდა უკეთესია. იდეა მცირე მთავრობის სწორი და კარგია, თუმცა არასწორად არის შემოთავაზებული მთავრობის მიერ", - განაცხადა ჭიაბერაშვილმა.

მას ჯანდაცვის კომიტეტის თავმჯდომარე აკაკი ზოიძე გამოეხმაურა. მისი თქმით, ნაციონალური მოძრაობის მმართველობის დროს სიღარიბე ეკონომიკური ზრდის პირობებში ზრდებოდა, ქართული ოცნების ხელისუფლებაში მოსვლის შემდეგ, 2013 წლიდან კი სიღარიბე შემცირებულია. 

"ადმინისტრაციული დანახარჯები, რომელიც არის 4.% და არა 27, 32 და რაღაც ციფრებს რომ იძახით და შემცირდება 3.9%-მდე. თქვენ რასაც იძახით, ეს არის ბიუჯეტის ზომა ეკონომიკის ზომასთან. ეს არის სახელმწიფოს მხრიდან განკარგვადი და არავითარი ბიუროკრატიული ხარჯები ეს არ არის, ეს არის ხარჯები ჯანდაცვაზე, განათლებაზე, თავდაცვაზე, ეს არის ხარჯები, რისთვისაც სახელმწიფო გვაქვს", - განაცხადა აკაკი ზოიძემ.

პარლამენტში მიმდინარე პროცესებს პრეზიდენტის საპარლამენტო მდივანი ანა ნაცვლიშვილიც გამოეხმაურა. 

2 ივლისს, ბიუროს სხდომაზე პარლამენტმა მთავრობის მოთხოვნა გაიზიარა და სტრუქტურული ცვლილებების დაჩქარებული წესით განხილვას დათანხმდა. ეს ნიშნავს, რომ 116 კანონში შესატან ცვლილებას პარლამენტის ექვსივე სავალდებულო კომიტეტი დღეს განიხილავს. 

საქართველოს პარლამენტმა საქართველოს დროებით მთავრობას ნდობა 20 ივნისს გამოუცხადა. ახალი მთავრობა საქმიანობას სამი კვირის განმავლობაში შეასრულებს.