პრეზიდენტს მოქალაქეობის მინიჭების უფლებამოსილება ეზღუდება

მოქალაქეობის მინიჭების შესახებ კანონში ცვლილებების განხილვას, პარლამენტის იურიდიულ კომიტეტში ხმაური მოჰყვა.

ცვლილების მიხედვით, პრეზიდენტს ეკრძალება იმ კომისიის თავმჯდომარის დანიშვნა, რომელმაც სწორედ პრეზიდენტისთვის უნდა მოამზადოს რეკომენდაციები კონკრეტულ პირთან დაკავშირებით.

მოქალაქეობის მინიჭება, შეწყვეტა ან შეჩერება განისაზღვრება კომისიის დადგენილებით და არა პრეზიდენტის ბრძანებით. მოქალაქე ვეღარ მიმართავს პირდაპირ პრეზიდენტს გამონაკლისი წესით მოქალაქეობის მინიჭებისთვის.

ინიციატივა ალოგიკურად მიაჩნია პრეზიდენტის საპარლამენტო მდივანს ანა ნაცვლიშვილს. 

„ჩვენთვის მიუღებელია, რომ პრეზიდენტს ერთმევა შესაძლებლობა დანიშნოს იმ კომისიის თავმჯდომარე, რომელმაც სარეკომენდაციო ხასიათის დასკვნა უნდა მოუმზადოს პრეზიდენტს, მიანიჭოს თუ არა მოქალაქეობა ამა თუ იმ პირს. არის ძალიან ბევრი შემთხვევა, როდესაც საქართველოს ინტერესებშია, რომ ესა თუ ის სპორტსმენი იყოს ჩვენი გუნდის წევრი და მისთვის საქართველოს მოქალაქეობის მინიჭება რაც შეიძლება სწრაფად მოხდეს“, – განაცხადა ანა ნაცვლიშვილმა.

ანა ნაცვლიშვილის თქმით, საქართველოს მოქალაქეობის მინიჭების საკითხზე ცვლილებები პირადად თეა წულუკიანის ინტერესებში შედის.

„თუ გავიხსენებთ არცთუ შორეულ პრეისტორიას, იყო ძალიან დაძაბული და სამარცხვინო პოზიციონირება, რომელიც ამ საკითხებთან დაკავშირებით იუსტიციის მინისტრს ჰქონდა და ის კომისიას ებრძოდა“, - განაცხადა ანა ნაცვლიშვილმა.

ნაცვლიშვილის მოსაზრებებთან დაკავშირებით კომენტარი გააკეთა იუსტიციის მინისტრის მოადგილე მიხეილ სარჯველაძემ და თქვა, რომ აბსოლუტურად არაარგუმენტირებული იყოს ის პრეტენზიები, რომელიც გამოითქვა პრეზიდენტის გარკვეული უფლებამოსილებების ხელოვნურად შეზღუდვასთან დაკავშირებით.

ცვლილების მიხედვით, ასევე იგეგმება საქართველოს მოქალაქეობის მინიჭებაზე ცენზის გაზრდა. ცვლილბება შეეხება ორმაგი მოქალაქოების მიღებას.

ცვლილების მიხედვით, საქართველოს მოქალაქე, რომელიც უცხო ქვეყნის მოქალაქეობას იღებს, საქართველოს მოქალაქეობა იმ შემთხვევაში შეუნარჩუნდება, თუ უცხო ქვეყნის მოქალაქეობამდე, საქართველოს სახელმწიფოდან ქართული პარსპორტის შენარჩუნებაზე თანხმობას მიიღებს. 

2017 წლის 26 სექტემბერს, საქართველოს პარლამენტმა ახალი კონსტიტუცია მესამე მოსმენით მიიღო. ახალი კოსტიტუციით, საქართველოს მოქალაქისთვის სხვა ქვეყნის მოქალაქეობის მიღება აკრძალული აღარ არის.