კომისიის სხომაზე ეკა ბესელიამ ირაკლი აბესაძეს კანონის დაცვისკენ მოუწოდა

პარლამენტის იურიდიულ საკითხთა კომიტეტის თავმჯდომარე ეკა ბესელია აცხადებს, რომ დროებით საგამოძიებო კომისიას კანონით, ოპერატიული ინფორმაციის მიღების უფლებამოსილება არ აქვს. ეს განცხადება ბესელიამ მოზარდების მკვლელობის საქმეზე „ევროპული საქართველოს“ წევრების მიერ გამომძიებლებთან დასმული კითხვების შინაარსის გამო გააკეთა. 

როგორც ეკა ბესელიამ აღნიშნა, საგამოძიებო კომისიამ მაქსიმალურად ზედმიწევნით უნდა დაიცვას კანონი.

„პროცედურის დარღვევაა, თან ძალიან უხეში თუ ჩვენ მოვითხოვთ ოპერატიული ინფორმაციის მიღებას, მაშინ, როდესაც კანონში პირდაპირ წერია, რომ ასეთი ინფორმაციის მიღების შესაძლებლობა აქვს კონკრეტულ პირებს და ჩამოთვლილია ეს პირები. ირაკლი აბესაძე რასაც აკეთებს ახლა, ეს არის პირდაპირი მცდელობა კანონის დარღვევის. არ შეიძლება, თუ ეს ინფორმაცია გვინდა, ის მივიღოთ კანონის დარღვევის ხარჯზე. ამიტომ, მოგმართავთ თქვენ, როგორც თავმჯდომარეს, უზრუნველყოთ, რომ კანონის მოთხოვნა იყოს დაცული. ეს არც დახურულ რეჟიმში შეიძლება, არც ღია რეჟიმში და პარლამენტის წევრმა ეს უნდა იცოდეს“, - განაცხადა ეკა ბესელიამ. 

ხორავას ქუჩაზე მომხდარ მკვლელობის საქმესთან დაკავშირებით შექმნილი საგამოძიებო კომისიის სხდომა დღეს კამათის ფონზე მიმდინარეობდა, რის გამოც სხდომაზე ტექნიკური შესვენება გამოცხადდა. 

კამათი საპარლამენტო უმრავლესობის და უმცირესობის წარმომადგენლებს შორის უმცირესობის დეპუტატების კითხვებმა გამოიწვია. მათ შორის დეპუტატ ირაკლი აბესაძის მიერ დასმულმა კითხვებმა. აბესაძე დაინტერესდა, თუ რა ფორმით შემოწმდა ჩხუბში მონაწილე მოზარდების ტელეფონები და რა ფორმით გამოიკითხა ხორავას ქუჩაზე მცხოვრებლები.

სამინისტროს წარმომადგენლებმა დეპუტატის კითხვაზე უპასუხეს, რომ როგორც გამოკითხვები, ისე ტელეფონები „პოლიციის შესახებ“ კანონით და ასევე „ოპერატიულ-სამძებრო საქმიანობის“ შესახებ კანონის შესაბამისად ჩატარდა. მათივე განცხადებით, სწორედ ამ კანონების შესაბამისად, გამოიკითხა მოწმეები, მოზარდები, ხორავას ქუჩის მცხოვრებლები, თუმცა რიგ შემთხვევაში ოქმები და პატაკები წერილობით არ შედგენილა.

დღეის მდგომარეობით, კომისიამ საქმეზე ორი რეკომენდაცია გასცა. 

საგამოძიებო კომისიის პარალელურად, გამოძიებას ხელახლა აწარმოებს შინაგან საქმეთა სამინისტრო. 

ხორავას ქუჩაზე ორი არასრულწლოვანი დავით სარალიძე და ლევან დადუნაშვილი 2017 წლის 1 დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა. მეორე - მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა.