51-ე სკოლის დირექტორმა, საგამოძიებო კომისიის სხდომაზე, მოზარდების მკვლელობის დღე გაიხსენა

სკოლის საპირფარეშოს ინციდენტზე პოლიციაში ჩემი გამოკითხვის დროს გავიგე, მითხრეს, რომ იყო ასეთი შემთხვევა, - ამის შესახებ 51-ე სკოლის დირექტორის მოადგილემ, თინათინ ყენიამ ხორავას ქუჩაზე მკვლელობის საქმის საგამოძიებო კომისიის სხდომაზე სალომე ზურაბიშვილის კითხვის პასუხად განაცხადა.

დეპუტატმა ზურაბიშვილმა თინათინ ყენიას ჰკითხა, მიაწოდა თუ არა სკოლის მანდატურმა მას ინფორმაცია, რომ სკოლის საპირფარეშოში მოსწავლეებს შორის მოხდა კონფლიქტი. ყენიას თქმით, მანდატურს მისთვის მსგავსი არაფერი უთქვამს.

სალომე ზურაბიშვილი დაინტერესდა, მოგვიანებით თუ ჰკითხა თინათინ ყენიამ მანდატურებს საპირფარეშოში მომხდარის შესახებ, რაზეც 51-ე სკოლის დირექტორის მოადგილემ განაცხადა, რომ მან კომისიის დღევანდელ სხდომაზე გაიგო, რომ მანდატური შეესწრო მოსწავლეებს შორის საპირფარეშოში მომხდარ კონფლიქტს.

„პირველად გავიგე ახლა აქ, კომისიის სხდომაზე, რომ მანდატურმაც იცოდა ეს ამბავი. ხორავას ქუჩაზე მომხდარის შემდეგ, მე ვესაუბრე ორ მანდატურს, თემურ ზადიშვილსა და გიორგი მელიქიძეს, რომლებიც იმ დღეს მუშაობდნენ, თუმცა არც ერთს არ უთქვამს, რომ საპირფარეშოში რაიმე მოხდა“, – განაცხადა თინათინ ყენიამ.

ხორავას ქუჩაზე მკვლელობის საქმის შემსწავლელი დროებითი საგამოძიებო კომისიის სხდომები 9 ივლისიდან განახლდება. როგორც კომისიის დღევანდელ სხდომაზე თავმჯდომარემ, სერგი კაპანაძემ განაცხადა, ორშაბათს, 9 ივლისს კომისიის სამკაციან ჯგუფებში სრულწლოვან თვითმხილველებს გამოკითხავენ, ხოლო სამშაბათს – არასრულწლოვნებს.

ოთხშაბათს კომისიის სხდომა გაფართოებული ფორმატით ჩატარდება, სადაც სამხარაულის ექსპერტიზის ბიუროს ექსპერტებს მოუსმენენ, ხოლო ხუთშაბათს დამოუკიდებელ ექსპერტს გამოკითხავენ.

დღეის მდგომარეობით, კომისიამ საქმეზე ორი რეკომენდაცია გასცა. 

საგამოძიებო კომისიის პარალელურად, გამოძიებას ხელახლა აწარმოებს შინაგან საქმეთა სამინისტრო. 

ხორავას ქუჩაზე ორი არასრულწლოვანი დავით სარალიძე და ლევან დადუნაშვილი 2017 წლის 1 დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა. მეორე - მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა.