სტიქიის გამო, სოფელ ტიტაში მხოლოდ ოთხი ოჯახი ცხოვრობს

მესტიის მუნიციპალიტეტის სოფელ ტიტაში ადგილობრივები გადაადგილებას მხოლოდ ტყის მასივების გავლით ახერხებენ, რადგან სოფელთან დამაკავშირებელი ყველა გზა მდინარე ნენსკრამ ჩარეცხა. 

,,სოფელი ტიტა ოკრილის ხეობიდან სამ კილომეტრში მდებარეობს. ოკრილა სწორედ ის მთაა სადაც წყლის შეგუბებითი პროცესები დაიწო, რასაც თან დაერთო რამდენიმედღიანი ნალექი, რომელიც ღვარცოფად გადაიქცა. როცა მთის ჩამოქცევის ხმა გავიგეთ, გარეთ გამოვედით, ნენსკრა კალაპოტიდან იყო ამოსული, წყლის დინებამ ორი ხიდი წაიღო და ასევე სოფელთან დამაკავშირებელი ცენტრალური მაგისტრალი ექვს მონაკვეთზე დააზიანა. ფაქტობრივად, გარესამყაროს ვართ მოწყვეტილები. არც ელექტროენერგია გვაქვს,"- აცხადებს ადგილობრივი ზაურ კაპანაძე.

ცნობისთვის სოფელში ამ დროისთვის ოთხი ოჯახია დარჩენილი.

5 ივლისს ჭუბერის ხეობაში ძლიერი წვიმების შედეგად სოფელი ჭუბერი გზის მთავარ მაგისტრალს მოწყდა. 

მდინარე ნენსკრამ დაანგრია ხიდები და რამდენიმე სახლი. მიმდებარე ტერიტორიიდან მოსახლეობის ევაკუაცია განხორციელდა. 

სტიქიის ზონაში ამ დროისთვის ვითარება სტაბილურია. უკვე გახსნილია ჭუბერის ორი ნაწილის დამაკავშირებელი სამანქანო გზა. მიმდინარეობს მდინარის კალაპოტის იმ ადგილების გამაგრება, რომელმაც შეიძლება საფრთხე შეუქმნას მოსახლეობას. ადგილზე შევიდა დამატებითი მძიმე ტექნიკა.

8 ივლისს პრეზიდენტმა ჭუბერში სტიქიის სალიკვიდაციო სამუშაოებში ჩართვისთვის საქართველოს სამხედრო ძალების გამოყენების შესახებ ბრძანება გამოსცა.