კალაძე არასამთავრობოების ნაწილს: შანტაჟის ენით იმათ ელაპარაკეთ, ვისთანაც ეს გაგდიოდათ

შანტაჟის ენით მათ ელაპარაკეთ, ვისთანაც ეგ საუბარი გაგდიოდათ, - ამ სიტყვებით მიმართა თბილისის მერმა, კახა კალაძემ ცხოველთა უფლებების დამცველ არასამთავრობო ორგანიზაციების ნაწილს.

კალაძე გამოეხმაურა სოციალურ ქსელში გავრცელებულ ინფორმაციას, რომ ცხოველთა მონიტორინგის სააგენტოში ერთ-ერთი ლეკვი მკვდარ ძაღლებში ჩასვეს.

კალაძის თქმით, ინფორმაცია ემსახურება ცხოველთა მონიტორინგის სააგენტოს დისკრედიტაციას.

“საქმე გვაქვს სისხლის სამართლის დანაშაულთან. გამოძიება უკვე დაწყებულია 259-ე მუხლით, თუმცა მე მგონია, რომ ეს მუხლი გადასახედია და კიდევ უფრო უნდა გამკაცრდეს, რომ მსგავსი ფაქტები ავიცილოთ თავიდან“, - განაცხადა თბილისის მერმა.

კალაძე იმედოვნებს, რომ დამნაშავე უმოკლეს ხანებში გამოვლინდება და დაისჯება პირი, რომელმაც „ამაზრზენი დანაშაული ჩაიდინა და უმწეო ლეკვი განათავსა მკვდარ ცხოველებთან, რითაც დაარღვია შიდა სანიტარული წესები“.

თბილისის მერის თქმით, ამ საქმეს პირადად აკონტროლებს.

16 ივლისს, მერიასთან ცხოველთა უფლებების დამცველთა აქცია სააგენტოს ხელმძღვანელის, ვახტანგ ლომჯარიას გადადგომისა და პასუხისგებაში მიცემის მოთხოვნით გაიმართა. 

მათი თქმით, სოციალურ ქსელში გავრცელებული ვიდეოკადრები ნათლად ასახავს, თუ როგორ სასტიკად ეპყრობიან თავშესაფარში ცხოველებს. 

რამდენიმე დღის წინ ცხოველთა მონიტორინგის სააგენტო სკანდალში გაეხვა. სოციალურ ქსელ Facebook-ში გავრცელდა ვიდეო, რომელზეც თბილისის მერიის ცხოველთა მონიტორინგის თავშესაფარში მკვდარი და მომაკვდავი ძაღლებია ასახული. 

ცხოველთა დამცველები წერდნენ, რომ მიუსაფარ ცხოველებს დაუნდობლად ეპყრობიან. ისინი ასევე ითხოვდნენ ჯერ კიდევ ცოცხალი ცხოველების ქუჩაში დაბრუნებას.

14 ივლისს ცხოველთა მონიტორინგის სააგენტომ სოციალურ ქსელში მკვდარი ცხოველებისთვის განკუთვნილ ოთახში გადაღებულ კადრებზე განცხადება გაავრცელა და გამოძიების დაწყება მოითხოვა.

16 ივლისს ვახტანგ ლომჯარიამ თავშესაფარში არსებული ვითარება თბილისის მერის მოადგილეს მაია ბითაძესა და მედიის წარმომადგენლებს გააცნო. მისი თქმით, თავშესაფარში ყოველდღიურად 300-მდე ცხოველია, რომელთაც სხვადასხვა სახის მკურნალობა და სტერილიზაცია უტარდებათ.