შახტში აფეთქებისას გადარჩენილი მეშახტე ტრაგედიის დეტალებს იხსენებს

მინდელის შახტში 16 ივლისს დაშავებული მუშა, გიგა მიქიაშვილი აფეთქების დეტალებს იხსენებს და ამბობს, რომ მუშაობის პროცესში აფეთქების შესახებ გააფრთხილეს, თუმცა მან ტერიტორია არ დატოვა და სწორედ ამან გადაარჩინა. ინფორმაციას palitravideo.ge-ი ავრცელებს.

მიქიაშვილი ამბობს, რომ გაზზე ყველაფერი შემოწმებული იყო.

"სამუშაო ადგილზე ვიმყოფებოდი. იქ ისეთი ადამიანი მუშაობდა, გაზს გაუზომავს არასდროს ტოვებდა. როცა გაზი იყო, უბანს აჩერებდა რომ აფეთქება არ მომხდარიყო. მუშაობის პროცესში ჩამოვიდნენ და გვითხრეს, რომ მოსალოდნელი იყო აფეთქება და გავსულიყავით. მე ვთქვი, რომ არ გავიდოდი, იმიტომ, რომ ფიცრებს ვალაგებდი ნახშირი რომ არ დაგვყროდა. ამ ლაპარაკში ყურებში წნევა ვიგრძენი. ძირს დამაგდო. არ გავთიშულვარ. ჩემს გვერდით ორი მუშა გაითიშა. უცებ წამოვხტი და ინტუიციით მივხვდი საით გავსულიყავი.

გარეთ რომ გამოვედი გიორგი აბულაძე ვნახე. ძალიან დამწვარი იყო. როგორც კი ადამიანის შეხება იგრძნო, შემომეხვია. მოძრაობის საშუალებას არ მაძლევდა. პანიკაში იყო. წამოვიყვანე და გზაში ფორჩხიძე ლაშა ვნახე, რომელსაც ბოლო წუთები ჰქონდა ალბათ. ვერ ვიშორებდი აბულაძეს. ვიფიქრე, ამას გავიყვან-მეთქი და მერე მოვბრუნდებოდი და ამასაც მივხედავ-მეთქი, მაგრამ გასასვლელში კიდევ ერთი დამწვარი ადამიანი ვნახე. ძალიან დიდი დამწვრობები ჰქონდა. მერე მეორე უბნის ბიჭები მომეშველნენ. ბიჭებმა უკან აღარ მიმაბრუნეს და გამომიყვანეს სამშვიდობოს. ალბათ, იმან გადამარჩინ, რომ არ გამოვედი. იქ რომ გავსულიყავი, მეც დამწვარი ვიქნებოდი, ან მკვდარი,“ - განაცხადა გიგა მიქიაშვილმა.

ტყიბულის შახტში ტრაგედია 16 ივლისს, დილით მოხდა. დაიღუპა 4 მუშა, 6 კი დაშავდა. ორ დაშავებულს ხელის მტევნების ფუნქციის შენარჩუნებისთვის კანის გადანერგვის ოპერაცია დასჭირდა.

გამოძიების პირველადი ინფორმაციით, შახტის ერთ-ერთ გვირაბში, სავარაუდოდ, მეთანის აფეთქების შედეგად კედლების დეფორმაციას ჭერის ჩამოშლა მოჰყვა.

სახელმწიფომ შახტის დახურვის გადაწყვეტილება ტრაგიკული შემთხვევის შემდეგ მიიღო. გამოძიების დასრულებამდე ტყიბულში არსებული ყველა შახტი დაილუქება.

მამუკა ბახტაძემ 16 ივლისს განაცხადა, რომ ეკონომიკის სამინისტრო მუშაობს კომპანიასთან და ის ადამიანები, ვინც ტყიბულის შახტში იყვნენ დასაქმებულნი, ჩვეულებრივ მიიღებენ სახელფასო ანაზღაურებას.

მინდელის შახტში არსებული მდგომარეობის დასათვალიერებლად შრომის ინსპექტორების ჯგუფი ჩავიდა. ამასთან, ცნობილი გახდა, რომ მომხდარის მიზეზების კვლევაში უცხოელი ექსპერტებიც ჩაერთვებიან.

მომხდართან დაკავშირებით 16 ივლისი გლოვის დღედ გამოცხადდა.

ამავე შახტში 5 აპრილს 6 მუშა დაიღუპა.