მინდელის შახტში აფეთქების მიზეზებს გერმანელი ექსპერტებიც შეისწავლიან

ტყიბულში, მინდელის შახტში არსებული მდგომარეობის დასათვალიერებლად შრომის ინსპექტორების ჯგუფი დღეს ჩავიდა. ამასთან, ცნობილი გახდა, რომ მომხდარის მიზეზების კვლევაში უცხოელი ექსპერტებიც ჩაერთვებიან. ამის შესახებ ჯანდაცვის სამინისტროს შრომის ინსპექციის დეპარტამენტის უფროსმა ბექა ფერაძემ თქვა. ინფორმაციას სააგენტო "ინტერპრესნიუსი" ავრცელებს.

მოლაპარაკებები 4 საერთაშორისო საკონსულტაციო კომპანიის წარმომადგენლებთან მიმდინარეობს, რომელთაგან გერმანელ ექსპერტთა ჯგუფი კონსულტაციების გასამართად საქართველოში ხვალ, 18 ივლისს ჩამოვა. 

"რაც შეეხება უცხოელი ექსპერტების ჩართულობას, მომხდარის შემდეგ, მივმართეთ შრომის საერთაშორისო ორგანიზაციას, რომელმაც ოთხ საექსპერტო-საკონსულტაციო ორგანიზაციას გაუწია რეკომენდაცია, საიდანაც ერთს შევარჩევთ. მოლაპარაკებებს ოთხივე ორგანიზაციასთან ვაწარმოებთ. აქედან ერთი ორგანიზაციის წარმომადგენლები, რომლებიც გერმანელი ექსპერტებით არის დაკომპლექტებული, საქართველოში დღეს ან ხვალ იქნებიან. ხვალვე დაიწყება საკონსულტაციო შეხვედრები ამ ექსპერტებთან; რა გადაწყვეტილება იქნება მიღებული, უახლოეს პერიოდში გახდება ცნობილი. უნდა შევხვდეთ და გავიგოთ რა სქემას გვთავაზობენ. ამის შემდეგ მივიღებთ გადაწყვეტილებას“, - განაცხადა ფერაძემ. 

ფერაძის განმარტებით, ტყიბულის შახტებში უბედური შემთხვევის მოკვლევა აპრილში განხორციელდა, ხოლო ინსპექტირება შახტებში გასული წლის ბოლოს ჩატარდა.

ტყიბულის შახტში ტრაგედია 16 ივლისს, დილით მოხდა. დაიღუპა 4 მუშა, 6 კი დაშავდა. მომხდართან დაკავშირებით 16 ივლისი გლოვის დღედ გამოცხადდა.

გამოძიების პირველადი ინფორმაციით, შახტის ერთ-ერთ გვირაბში, სავარაუდოდ, მეთანის აფეთქების შედეგად კედლების დეფორმაციას ჭერის ჩამოშლა მოჰყვა.

გამოძიების დასრულებამდე ტყიბულში არსებული ყველა შახტი დაილუქა. სახელმწიფომ შახტის დახურვის გადაწყვეტილება ტრაგიკული შემთხვევის შემდეგ მიიღო.

მამუკა ბახტაძემ 16 ივლისს განაცხადა, რომ ის ადამიანები, ვინც ტყიბულის შახტში იყვნენ დასაქმებულნი, ჩვეულებრივ მიიღებენ სახელფასო ანაზღაურებას.

ამავე შახტში 5 აპრილს 6 მუშა დაიღუპა.