შსს არასრულწლოვანთა დანაშაულის შესახებ Unicef-ის კვლევას არ ეთანხმება

შინაგან საქმეთა სამინისტრო გაეროს ბავშვთა ფონდის მიერ გამოქვეყნებულ კვლევას არ ეთანხმება. ანგარიშში ბავშვებზე დაყრდნობით წერია, რომ ქურდობასთან ან რაიმე სხვა დანაშაულთან დაკავშირებით, ბავშვების ჯგუფის დაკავების შემთხვევაში, პოლიციის ოფიცრები ასკვნიან, რომ დანაშაული 14 წლამდე ასაკის ბავშვმა ჩაიდინა, ან არწმუნებენ ამ ბავშვებს, დანაშაული თავიანთ თავზე აიღონ. 

კვლევის შესახებ კომენტარი შს მინისტრის მოადგილემ ნათია მეზვრიშვილმა გააკეთა. მისი განცხადებით, შს სამინისტრო დღეს ამ პრობლემის წინაშე არ დგას. მის კომენტარს სააგენტო "ინტერპრესნიუსი" ავრცელებს.

"ჩვენ ეს საკითხი შევისწავლეთ და გარკვეული კითხვები გაჩნდა იმასთან დაკავშირებით, 14 წლამდე პირების უკან ხომ არ დგანან კრიმინალური დაჯგუფებები ან სრულწლოვნები. ესენი არიან ძირითადად 14 წელს მიღწეული პირები, 14-დან 18 წლამდე მოზარდები, რომლებიც 14 წლამდე პირებთან ერთად დანაშაულს ჩადიან და როგორც კი ამ ადამიანების იდენტიფიცირება ხდება, მიმდინარეობს შესაბამისი პროცედურები, ტარდება გამოძიება ამ მოზარდების მიმართ და სისხლის სამართლებრივი დევნა იწყება. 14 წლამდე პირებს რაც შეეხება, ჩვენ არაერთხელ ვთქვით, რომ რეფერირების მექანიზმის დახვეწაზე ვმუშაობდით, იმიტომ რომ ასაკის დაწევა და სისხლის სამართლებრივი პასუხისმგებლობის დაკისრება 14 წლამდე პირებისთვის არ არის ადეკვატური პასუხი, რომელიც სახელმწიფომ ამ პრობლემის მოსაგვარებლად უნდა შესთავაზოს მოსაზრდებს. შესაბამისად, რეფერირების მექანიზმზე მუშაობა დასრულდა და უახლოეს დღეებში ეს უკვე კანონპროექტის სახეს მიიღებს”, - აღნიშნა ნათია მეზვრიშვილმა.

მინისტრის მოადგილის თქმით, უწყება აღიარებს, რომ ამ მიმართულებით როცა საქმე ეხება ქუჩაში მომუშავე ბავშვებს, გამოწვევების წინაშეა სახელმწიფო, მათ შორის შსს. 

"ამისთვის საკმაოდ ქმედით ნაბიჯებს ვდგამთ, ვაძლიერებთ უწყებებს შორის კოორდინაციას. ამ ქმედითი ნაბიჯების ნათელი დასტურია, მათ შორის რამდენიმე კვირის წინ ჩატარებული ის ოპერაცია, რომელიც ცენტრალური კრიმინალური პოლიციის დეპარტამენტმა ჩაატარა, რომელიც სწორედ ბავშვების იძულებით შრომაში ჩაბმის პრობლემის მოგვარებისკენ იყო მიმართული. ამ ოპერაციის შემდეგ, ქუჩაში მომუშავე ბავშვების რაოდენობა საკმაოდ არის შემცირებული. ასევე საკმაოდ აქტიურად ვმუშაობთ ამ მიმართულებით. ეს არ არის პრობლემა, რომელიც ერთ დღეში მოგვარდება, შესაბამისად, კოორდინაცია გაზრდილია. აქტიურად ვმუშაობთ პრევენციაზე და რაც მთავარია, პოლიცია ამ პრობლემის მოსაგვარებლად გააქტიურებულია", - აღნიშნა ნათია მეზვრიშვილმა.

Unicef-ის ცნობით, თბილისში სექტისმაგვარი დაჯგუფება არსებობს სახელწოდებით „მორგის ბავშვები“.

კვლევა გაერო-ს ბავშვთა ფონდმა ჯანდაცვის სამინისტროსთან, ევროკავშირთან, „ვორლდვიჟენთან“, ფონდ „ღია საზოგადოება საქართველოსთან“, „კარიტას საქართველოსთან“, გაერო-ს ბავშვთა ფონდის აზერბაიჯანის ოფისსა და შინაგან საქმეთა სამინისტროსთან ერთად ჩაატარა.