პირველი არხი და myvideo შერიგდნენ

პირველ არხსა და Myvideo-ს შორის სამართლებრივი დავა შეწყდება. საუბარია მსოფლიო ჩემპიონატის თამაშების ტრანსლირების გამო დაწყებულ უთანხმოებაზე. ამასთან, მაუწყებელი მზად არის, Myvideo-სთან თანამშრომლობა გააგრძელოს. ამის შესახებ პირველი არხის მედიისა და კომუნიკაციის ბლოკის დირექტორმა, თინათინ ბერძენიშვილმა განაცხადა. ინფორმაციას 1tv ავრცელებს.

პირველმა არხმა უკვე მიიღო „აი თი დი სი“-ს დირექტორის, დავით მოსულიშვილის წერილი, სადაც ის საზოგადოებრივი მაუწყებლის გენერალურ დირექტორს, ვასილ მაღლაფერიძეს და სამეურვეო საბჭოს წევრებს მიმართავს და უთანხმოების გამო წუხილს გამოთქვამს.

„გვინდა გაცნობოთ, რომ კომპანია სს „აი თი დი სი“ (Myvideo) და მისი მენეჯმენტი წუხილს გამოთქვამს ფეხბურთში 2018 წლის მსოფლიო ჩემპიონატის ტრანსლაციის შედეგად შექმნილი ვითარების და წარმოქმნილი უთანხმოების გამო. სამწუხაროდ, კომპანია სს „აი თი დი სი“-მ ვერ გამოიჩინა შესაბამისი მზაობა, ჩართულიყო მოლაპარაკებებში, რაც შესაძლებლობას მოგვცემდა აგვერიდებინა საზოგადოებრივი მაუწყებლის მოთხოვნების და ინტერესების დარღვევა. საზოგადოებრივი მაუწყებლის მაღალი სახელმწიფო და საზოგადოებრივი მნიშვნელობიდან გამომდინარე, ასევე მის მაყურებელთა პატივისცემის ნიშნად, გვსურს, შემოგთავაზოთ შექმნილი ვითარებიდან გამოსავლის მოსაძებნად მოლაპარაკებების დაწყება არსებული უთანხმოების კონსტრუქციული გზებით მოგვარების და მომავალში მსგავსი პრეცედენტების პრევენციის მიზნით“, - წერია „აი თი დი სი“-ს წერილში.

ვებგვერდზე გამოქვეყნებულ განცხადებაში კი, Myvideo საზოგადოებრივი მაუწყებლის მენეჯმენტს და პირადად ვასილ მაღლაფერიძეს მადლობას უხდის და აღნიშნავს, რომ „შესაძლოა მომხმარებლების ინტერესების დასაცავად ემოციურ ფონზე მიღებული გადაწყვეტილებები სამართლებრივად ან მორალურად სრულად კორექტული ვერ ყოფილიყო, თუმცა ამ შეცდომის აღიარებაც ღირსების საკითხია და ჩვენ ჩვენს თავზე ვიღებთ ჩვენს წილ პასუხისმგებლობას“.

28 ივნისს კომუნიკაციების ეროვნულმა კომისიამ Myvideo.ge-ს საზოგადოებრივ მაუწყებელზე ფეხბურთის მსოფლიო ჩემპიონატის მატჩების ტრანსლირების დროს, საზოგადოებრივის სიგნალის გათიშვა დაავალა. ამის მიზეზი კი ის არის, რომ მაუწყებელი მატჩების ტრანსლირების ექსკლუზიურ უფლებას ფლობს. 

3 ივლისს Myvideo.ge-მ განაცხადა, რომ ისინი სიგნალის გათიშვას არ აპირებდნენ.

5 ივლისს კომუნიკაციების ეროვნულმა კომისიამ საზოგადოებრივი მაუწყებლის უფლებების დარღვევისთვის, კერძოდ, ფეხბურთში მსოფლიო ჩემპიონატის მატჩების ტრანსლაციის არამართლზომიერი ჩვენებისთვის Myvideo.ge 3 000 ლარით დააჯარიმა.

12 ივლისს კი სასამართლომ Myvideo.ge-ს მსოფლიო ჩემპიონატის მატჩების ტრანსლირება აუკრძალა