ფინანსთა სამინისტრო: იმპორტირებულ ხე-ტყეზე დღგ გაუქმდება

ფინანსთა სამინისტროს ინიციატივა, იმპორტულ ხე-ტყეზე დღგ-ს გადასახადის გაუქმებას და იმავდროულად ნედლ ხე-ტყეზე რეექსპორტის შეზღუდვას შეეხება. ამის შესახებ ფინანსთა მინისტრის მოადგილემ, ნიკოლოზ გაგუამ განაცხადა. მანამდე ამ ინიციატივის შესახებ ახალმა პრემიერმაც ისაუბრა.

„საგადასახადო კოდექსში ცვლილებები ეს არის დიდი ეკოლოგიური ღონისძიებების პაკეტის ერთ-ერთი ნაწილი. ეს ითვალისწინებს იმპორტულ ხე-ტყეზე დღგ-ს გადასახადის გაუქმებას და იმავდროულად, რეექსპორტის გარკვეულწილად შეზღუდვას ხე-ტყეზე, მისი ნედლი ფორმით. ძალიან მნიშვნელოვანია, რომ საქართველიდან გასულ პროდუქტს მეტი დამატებითი ღირებულება შეექმნას, თუმცა ის, რომ იმპორტი გაიაფდება ამ ძალიან სენსიტიურ პროდუქტზე, ეს ძალიან მნიშვნელოვანია. გარკვეული ინიციატივები იქნება ხის ჭრასთან დაკავშირებით და გარემოზე ზემოქმედება მნიშვნელოვნად გაუმჯობესდება", - ამბობს გაგუა.

26 ივლისს ფინანსთა სამინისტროს საგამოძიებო სამსახური ხე-ტყის უკანონო ჭრის ფაქტების შესასწავლად სოფელ ჭუბერსა და ხაიშში შევიდა. სამართალდამაცველებს ადგილობრივებმა მუშაობის საშუალება არ მისცეს და ქვები და ჯოხები ესროლეს.

5 ივლისს ჭუბერის ხეობაში ძლიერი წვიმების შედეგად სოფელი ჭუბერი გზის მთავარ მაგისტრალს მოწყდა. მდინარე ნენსკრამ დაანგრია ხიდები და რამდენიმე სახლი. სტიქიის ზონაში ჩასულმა საქართველოს პრემიერმინისტრმა მამუკა ბახტაძემ მაშინ თქვა, რომ ხე-ტყის ჭრის საკითხზე მთავრობის სხდომაზე იმსჯელებდნენ და რეგულაციების გამკაცრება დააანონსა.

ამასთან, ბახტაძემ განაცხადა, რომ მთავრობა შეურიგებელი იქნება ყველას მიმართ, ვინც ჩართულია ხე-ტყის უკანონო ჭრაში. ბახტაძემ ასევე თქვა, რომ ხე-ტყის ჭრა დღგ-სგან თავისუფლდება, რაც მისი თქმით ამ მიმართულებით დაინტერესებას შეამცირებს.

თუ როგორ აპირებს მთავრობა გაუმკლავდეს ამ სფეროში კრიზისს, იხილეთ ვრცლად სტატია.