გრიგოლ ვაშაძემ ნაციონალების და ევროპული საქართველოს წინასაარჩევნო შეთანხმება დაარღვია

ნაციონალური მოძრაობის წევრმა და 10 ოპოზიციური პარტიის გაერთიანების „ძალა ერთობაშია“ საპრეზიდენტო კანდიდატმა გრიგოლ ვაშაძემ, ნაციონალებსა და ევროპულ საქართველოს შორის, ბრიუსელში გაფორმებული შეთანხმება დაარღვია. ამის შესახებ ინფორმაციას „ტაბულა“ ავრცელებს.

„არც ვიცი რა ვუთხრა, ახლა ძალიან ევროპულ საქართველოს რომ ეძახიან თავის თავს, ყველაფერი უბედურება რომ მაგათი გაკეთებულია და მერე გავიდნენ პარტიიდან და ჰგონიათ ხალხს დაავიწყდება ეს უბედურება ვისი გაკეთებული იყო, ის შეცდომები და დანაშაულები“, - თქვა გრიგოლ ვაშაძემ 30 ივლისს, კახეთში ამომრჩევლებთან შეხვედრაზე. 

„ევროპულმა საქართველომ“ და „ნაციონალურმა მოძრაობამ“ საპრეზიდენტო არჩევნებთან დაკავშირებით, 11 ივლისს ბრიუსელში შეთანხმებას მოაწერეს ხელი. პროცესს ევროპის სახალხო პარტიის (EPP) პრეზიდენტ ჯოზეფ დოულიც ესწრებოდა.

“შეთანხმება სამი ძირითადი პუნქტისგან შედგება:

1. მხარს დავუჭერთ მეორე ტურში გასულ ერთმანეთის საპრეზიდენტო კანდიდატებს (რომელიც გავა);
2. კამპანიის დროს თავს შევიკავებთ ერთმანეთზე შეტევის და კრიტიკისგან;
3. არჩევნების პირველ და მეორე ტურებში მაქსიმალურად მოვახდენთ ამომრჩევლის მობილიზებას, რადგან არჩევნებია ხელისუფლების შეცვლის გზა“, - წერდა ევროპული საქართველოს ერთ-ერთი ლიდერი გიგი უგულავა Facebook-ზე.

„ევროპული საქართველოს“ წევრები ყოფილ თანაპარტიელებს 2017 წლის იანვარში გამოეყვნენ. მალევე ეგრეთ წოდებულმა ბოკერია-უგულავას ფრთამ საკუთარი პარტია „ევროპული საქართველო“ შექმნა და პარლამენტში, სადაც 2016 წლის არჩევნებში „ნაციონალური მოძრაობის“ სიით მოხვდა, საკუთარი ფრაქცია ჩამოაყალიბა. „ევროპული საქართველოს“ წევრები ნაციონალებისგან გამოყოფას ყოფილ სახელისუფლებო პარტიაში მართვის არადემოკრატიული და მიუღებელი ფორმის არსებობით ხსნიან, „ნაციონალური მოძრაობა“ კი მათ ღალატში ადანაშაულებს და ხელისუფლების სატელიტ ოპოზიციას უწოდებს. ორივე პარტია „ევროპის სახალხო პარტიის“ (EPP) წევრია საქართველოდან.

გრიგოლ ვაშაძე 10 ოპოზიციური პარტიის გაერთანებამ საპრეზიდენტო კანდიდატად 17 ივლისს წარადგინა. „ევროპული საქართველოს“ საპრეზიდენტო კანდიდატია დავით ბაქრაძე.

საქართველოში საპრეზიდენტო არჩევნები 2018 წლის ოქტომბერში გაიმართება.