კობახიძე: უნდა ჩატარდეს გამოძიება და დამნაშავემ პასუხი უნდა აგოს

საქართველოს პარლამენტის თავმჯდომარე ბათუმში მიმდინარე პროცესებს გამოეხმაურა. ირაკლი კობახიძემ გუშინდელი გამოსვლები 
შემაშფოთებლად და ვანდალურ აქტად შეაფასა. პარლამენტის სპიკერმა სამართალდამცვლებს სწორად და კარგად მოქმედებისთვის მადლობა გადაუხადა და განაცხადა, რომ ახლა მთავარი გამოძიების შედეგებია, რომელიც მათ პოლიტიკურ და სამართლებრივ პასუხისმგებლობას დააკისრებს. 

“დაზიანდა პოლიციის შენობები, ავტომობილები და კერძო საკუთრება, მინდა აღვნიშნო, რომ სწორად იმოქმედა სამართალდამცველებმა, სხვა სტანდარტი აჩვენეს ადამიანების მიმართ დამოკიდებულების. თანაზომიერების პრინციპის შესაბამისად მოქმედებდნენ სამართალდამცავი ორგანოები და ამისთვის მინდა მათ განსაკუთრებული მადლობა გადავუხადო. მნიშვნელოვანია გამოძიება ჩატარდეს და ამის საფუძველზე განისაზღვრება ვის რა სამართლებრივი და პოლიტიკური პასუხისმგებლობა ეკისრება”, - განაცხადა პარლამენტის თავმჯდომარემ.

საქართველოს პარლამენტის თავმჯდომარე ოფიციალური ვიზიტით გერმანიაში იმყოფება. ირაკლი კობახიძე პროგრესული ალიანსის ყრილობაში მონაწილეობს და მაღალი დონის შეხვედრებს მართავს.