რუსეთ-საქართველოს ომიდან ათი წელი გავიდა

რუსეთ-საქართველოს ომიდან ზუსტად ათი წელი გავიდა. ამ თარიღთან დაკავშირებით მუხათგვერდის ძმათა სასაფლაოზე მივიდნენ პარლამენტის თავმჯდომარე, თავდაცვის მინისტრი და დედაქალაქის მერი. ასევე აღმასრულებელი და საკანონმდებლო ორგანოს სხვა წარმომადგენლები და საკრებულოს წევრები.

ძმათა სასაფლაო გვირგვინით შეამკეს საქართველოში ჩამოსულმა უცხოელმა დიპლომატებმაც.

ირაკლი კობახიძის თქმით, აგვისტოს ომმა ტკივილთან ერთად სიამაყის გრძნობაც დატოვა, რომელიც ჩვენს გმირებს უკავშირდება.

„მადლობა უნდა გადავუხადოთ ჩვენს სამხედროებს, მოხალისეებს, თითოეულ იმ ადამიანს, რომელიც გულანთებული იდგა 10 წლის წინ ჩვენი ქვეყნის დამოუკიდებლობის დასაცავად. ჩვენ ვალი უნდა მოვიხადოთ მათ წინაშე და ყველაფერი გავაკეთოთ ქვეყნის დამოუკიდებლობისა და ტერიტორიული მთლიანობის აღდგენისათვის“, - განაცხადა ირაკლი კობახიძემ.

„ერთ-ერთი ჩვენი გმირის საფლავზე თქვენ ნახავთ წარწერას, რომ შევძლო წამოდგომა, ისევ თავს შევწირავდი ჩემს სამშობლოსო, ეს არის თავგანწირვის, სამშობლოს სიყვარულისა და იმ სულისკვეთების გამოხატულება, რაც ჩვენს გმირებს ახასიათებდათ. ჩვენ არასდროს არ დავივიწყებთ და მათი თავგანწირვის მაგალითები ყოველთვის გაგვაძლიერებს ჩვენი ქვეყნის კეთილდღეობის საქმეში“, - განაცხადა ლევან იზორიამ.

საგარეო საქმეთა სამინისტროს ორგანიზებით, მრგვალი მაგიდის ფორმატის შეხვედრა - "ხანგრძლივი მშვიდობისა და უსაფრთხოებისთვის- 2008 წლის რუსეთ-საქართველოს ომიდან 10 წლის შემდეგ" მიმდინარეობს.

2008 წლის აგვისტოს რუსეთ-საქართველოს ომში საქართველოს თავდაცვის სამინისტროს 170 მოსამსახურე, შინაგან საქმეთა სამინისტროს 14 თანამშრომელი და 224 სამოქალაქო პირი დაიღუპა.

ჯანდაცვის სამინისტროს მონაცემებით, დაჭრილ-დაშავებულ სამოქალაქო და სამხედრო პირთა რაოდენობა სულ 2 232-ია. მათ შორის, 1045 სამხედრო მოსამსახურე იყო.