გენერალ ქუთათელაძის მკვლელობაში ბრალდებულ გიორგი ჭანტურიას მამა საავადმყოფოში გადაიყვანეს

შინაგან საქმეთა სამინისტრომ გენერალ სამსონ ქუთათელაძის მკვლელობის საქმე გახსნა. მკვლელობაში ბრალდებულია გიორგი ჭანტურია.

„ქრონიკა“ მკვლელობის ბრალდებით დაკავებულ ჭანტურიას მამას, ზურაბ ჭანტურიას ესაუბრა. ის ამბობს, რომ საბრძოლო მასალა და იარაღები, რომელიც საგამოძიებო სამსახურის წარმომადგენლებმა საცხოვრებელი სახლის სარდაფიდან ამოიღეს, არც მას და არც მის შვილს არ ეკუთვნით.

ჭანტურიამ ასევე ისაუბრა, რომ სტამბოლის ბაზრის ტერიტორიაზე რამდენიმე ობიექტი აქვთ, თუმცა ეს ობიექტები სამსონ ქუთათელაძესთან სადავო არასდროს ყოფილა.

ინტერვიუს ჩაწერის დროს, ზურაბ ჭანტურია შეუძლოდ გახდა. ქრონიკის გადამღებმა ჯგუფმა სასწრაფო დახმარების ბრიგადა გამოიძახა და ის საავდმყოფოში გადაიყვანეს. ჭანტურია საგამოძიებო უწყებაში 3 საათზე იყო დაბარებული, თუმცა ჯანმრთელობის გაუარესების გამო, დაკითხვაზე ვერ მივა.

ადვოკატი ამბობს, რომ ჭანტურიას ბრალეულობის შესახებ მას დოკუმენტები არ მიუღია.

უწყების ინფორმაციით, გამოძიებამ დაადგინა, რომ ბრალდებული მიმდინარე წლის 15 იანვარს რუსთავში, ე.წ. „სტამბოლის ბაზრის“ ადმინისტრაციულ შენობაში გენერალ სამსონ ქუთათელაძესთან ერთად შევიდა, რომელთანაც მას დიდი ხნის განმავლობაში ჰქონდა დაპირისპირება.

შენობაში ბრალდებულსა და სამსონ ქუთათელაძეს შორის ფინანსურ საკითხებთან დაკავშირებით მოხდა შელაპარაკება, რის შემდეგაც ბრალდებულმა ცეცხლსასროლი იარაღიდან გასროლით სამსონ ქუთათელაძეს რამდენიმე ჭრილობა მიაყენა და შენობა დატოვა. ქუთათელაძე მიყენებული ჭრილობების შედეგად, ადგილზე გარდაიცვალა.

პოლიციამ, დაკავებულის საცხოვრებელი სახლის ჩხრეკისას, 3 ავტომატური ცეცხლსასროლი იარაღი, მჭიდები და საბრძოლო ვაზნები ამოიღო.

სამსონ ქუთათელაძის მკვლელობის გამოძიების პროცესში ყოფილი პროკურორი, გიორგი ჭანტურია 17 იანვარს დააკავეს, ოფიციალურად მის მიმართ საქმე სისხლის სამართლის 236-ე მუხლით დაიწყო, რაც საბრძოლო მასალის უკანონო შენახვას გულისხმობს. მოგვიანებით, ჭანტურია ბრალის წარდგენის გარეშე გაათავისუფლეს. 

რუსთავში, ე.წ. სტამბოლის ბაზრობის ტერიტორიაზე ყოფილი დეპუტატი, გენერალი სოსო ქუთათელაძე რუსთავში მოკლული 15 იანვარს იპოვეს.

გენერალი ქუთათელაძე იყო მე-7 მოწვევის პარლამენტის წევრი, ეროვნული გვარდიის სარდალი და საქართველოს შეიარაღებული ძალების გენერალური შტაბის განათლების დეპარტამენტის უფროსი.