მარგველაშვილი: სამწუხაროდ ჩვენ ვერ შევქმენით არაერთპარტიული საკონსტიტუციო დოკუმენტი

დღეს საქართველო ზეიმობს კონსტიტუციის დღეს და ამ ზეიმში არის სირთულეების გააზრებაც და მომავლის ხედვაც,- ამის შესახებ საქართველოს პრეზიდენტმა კონსტიტუციის დღისადმი მიძღვნილ მიღებაზე, სიტყვით გამოსვლისას განაცხადა.

პრეზიდენტმა დიპლომატებს, საერთაშორისო ორგანიზაციებს, საკონსტიტუციო სასამართლოს, სტუდენტებსა და არასამთავრობო ორგანიზაციების წარმომადგენლებს პრეზიდენტის სასახლეში უმასპინძლა.

გიორგი მარგველაშვილის თქმით, პოლიტიკოსების და ერთი ქართველის მიერ მეორე ქართველის დაჩაგვრა ჯერ კიდევ პოლიტიკური ელიტის სტილია.

„სამწუხაროდ ჩვენ ვერ შევქმენით არაერთპარტიული საკონსტიტუციო დოკუმენტი. ერთიან თემებზე გაერთიანება ჯერ კიდევ გვიჭირს. ღმერთმა დაგვიფაროს ყველა თემაზე ერთნაირად ვფიქრობდეთ, მაგრამ არის საკითხები, რომლებიც ჩვენში განსხვავება არ უნდა იყოს.მთავარი, რასაც მე ვესწრაფოდი ჩემს საპრეზიდენტო მუშაობაში, იყო ის, რომ ჩვენ მივსულიყავით საერთო წერტილებამდე. საქართველოში შექმნილიყო და შეიქმნება ისეთი პოლიტიკური ვითარება, რომელშიც ჩვენ ვაღიარებთ ერთმანეთის განსხვავებულობას, პატივს ვცემთ ამ განსხვავებულობას და მივცემთ შესაძლებლობას ყველა განსხვავებულ ადამიანს, ემსახუროს ჩვენს სამშობლოს“, - განაცხადა პრეზიდენტმა.

მისივე თქმით, მისი მიზანია საქართველო იყოს ერთიანი და ძლიერი თავის სუვერენიტეტში, თავის საზღვრებში.

„ბევრ ერს არ მისცემია შესაძლებლობა, თავის ენაზე დაწეროს თავისი კონსტიტუცია. ჩვენ ამის ბედნიერება გვაქვს და ეს შესაძლებლობა ბოლომდე უნდა გამოვიყენოთ. ისევე, როგორც ენა ან დამწერლობა არ არის რომელიმე ცალკეული პირის, ან პირთა ჯგუფის და ეკუთვნის მთელ ერს, ჩვენი კონსტიტუციაც არ არის საკუთრება რომელიმე პოლიტიკოსის ან განსწავლული მეცნიერის და იურისტის, ის არის ჩვენი ხალხის მთლიანად. ჩვენ ძალიან ცოტა ვართ და ერთმანეთი არ უნდა გავარჩიოთ საერო და ერთიან საქმეებში. მჯერა, რომ ასეთი საქართველო დადგება“, - აღნიშნა მარგველაშვილმა.

დღესვე საქართველოს კონსტიტუციის პრეზენტაციაზე საქართველოს პატრიარქმა, ილია მეორემ განაცხადა, რომ კონსტიტუცია უნდა ემსახურებოდეს ხალხს და არა პარტიებს, ან გარკვეულ წრეებს.

24 აგვისტო საქართველოს კონსტიტუციის მიღების დღეა. 23 წლის წინ, 1995 წლის 24 აგვისტოს, 17 საათსა და 50 წუთზე, საქართველოს პარლამენტმა 159 ხმით 8-ის წინააღმდეგ საქართველოს კონსტიტუცია მიიღო. 

26 სექტემბერს, საქართველოს პარლამენტმა ახალი კონსტიტუცია მესამე მოსმენით მიიღო. ამით ქვეყანაში კონსტიტუციური რეფორმის ათთვიანი პროცესი დასრულდა. სხდომა პოლიტიკური განცხადებებისა და ურთიერთბრალდებების ფონზე მიმდინარეობდა.