The New York Times Turning Points-მა ილია მეორეს და გიორგი მარგველაშვილს სპეციალური ჯილდო გადასცა

საქართველოს პრეზიდენტი გიორგი მარგველაშვილი, მეუღლე მაკა ჩიჩუასთან ერთად The New York Times-ის ლიცენზიანტი გამომცემლობა „სახე(ლ)ების“ მიერ ორგანიზებულ საუკუნისა და წლის სახე(ლ)ების დაჯილდოების ცერემონიას დაესწრო. ინფორმაციას პრეზიდენტის ადმინისტრაცია ავრცელებს.

ღონისძებაზე საქართველოში The New York Times-ის ლიცენზიანტი საგამომცემლო სახლის „სახე(ლ)ები“ 2018 წლის გამოცემების წარდგენა და საქველმოქმედო აუქციონი გაიმართა. ღონისძიებას დაესწრო ასევე საქართველოს პატრიარქი ილია მეორე. 

პრეზიდენტის ადმინისტრაციის ინფორმაციით, საგამომცემლო სახლის "სახე(ლ)ები" მიერ ორგანიზებულ ღონისძიებაზე გამოცემა The New York Times Turning Points-მა პატრიარქსა და პრეზიდენტს გამოცემის სპეციალური პრიზი გადასცა. საქართველოს პრეზიდენტს განსაკუთრებული პრიზი, რომლითაც The New York Times-ი სხვადასხვა საზოგადო მოღვაწეს ყოველწლიურად აჯილდოებს, შემწყნარებლობის იდეალების პოპულარიზაციისათვის გადაეცა. პრეზიდენტმა დაჯილდოების შემდეგ ღონისძიების ორგანიზატორებს მადლობა გადაუხადა და დამსწრე საზოგადოებას სიტყვით მიმართა.

თქვენო უწმინდესობავ, მადლობა მინდა გადაგიხადოთ, რომ ამ მნიშვნელოვან და ჰუმანურ საქმეს თქვენი ლოცვა-კურთხევა და მატერიალური მხარდაჭერა წაუმძღვარეთ. ის, რომ ჩვენ ვახორციელებთ ქველმოქმედებას და ამავე დროს, გავიღებთ ჩვენი საზოგადოების გაჭირვებული წევრების მიმართ, გვქმნის და გვაყალიბებს ჩვენ საზოგადოებად იმიტომ, რომ იმ განსხვავებულობის ფონზე, რომელიც ამშვენებს თითოეულ ინდივიდს, ან საზოგადოებრივ ჯგუფს, ან ამა თუ იმ შეხედულებას, გამაერთიანებელი ღირებულებების მნიშვნელობა არის ის, რაც ქმნის და ამთლიანებს ერს. ასეთი ღირებულების ირგვლივ შევიკრიბეთ ჩვენც.

დიდი მადლობა ამ ჯილდოსთვის! გისურვებთ წარმატებას - შევეხიდოთ ერთმანეთს ბავშვთა და მოხუცთა სახლის შექმნაში“, - განაცხადა საქართველოს პრეზიდენტმა.

ღონისძიებაზე სიმბოლური პრიზით საქართველოს პირველი ლედიც დაჯილდოვდა. მაკა ჩიჩუას გამომცემლობისგან საყოველთაო სიმპათიის პრიზი გადაეცა.

გამოცემის პრეზენტაციაზე გამომცემლობის „სახე(ლ)ები" სიმბოლური პრიზით სხვადასხვა ნომინაციაში დაჯილდოვდნენ, ასევე ქართული კულტურისა და ბიზნესის წარმომადგენლები, მათ შორის კომპოზიტორი გია ყანჩელი, ენათმეცნიერი მზექალა შანიძე, კინორეჟისორი მერაბ კოკოჩაშვილი, ფერმწერი და სცენოგრაფი გოგი ალექსი-მესხიშვილი და მხატვარი დიმიტრი ერისთავი.

ღონისძიების დასასრულს გამომცემლობის "სახე(ლ)ები" მიერ ცნობილი ადამიანების წარდგენილი ნივთების ტრადიციული საქველმოქმედო აუქციონი გაიმართა, საიდანაც შემოსული თანხით უმწეო მოხუცთა და უპატრონო ბავშვთა ინტეგრირებული სახლი აშენდება.