თალაკვაძე: თუ პრეზიდენტი მთავარი მოსამართლის კანდიდატურას წარმოადგენს, ჩვენ მას განვიხილავთ

საპარლამენტო უმრავლესობის ლიდერი არჩილ თალაკვაძე პრეზიდენტის გადაწყვეტილებას, უზენაესი სასამართლოს თავმჯდომარის პოსტზე კანდიდატი აღარ წარადგინოს, გამოეხმაურა.

„უზენაესი სასამართლოს თავმჯდომარის კანდიდატურასთან დაკავშირებით ჩვენ თავიდანვე გამოვთქვით სკეპტიკური დამოკიდებულება, არ გვქონდა მაღალი მოლოდინები, რომ პრეზიდემტი შეძლებდა ამ პროცესის წარმატებით დასრულებას. როგორც აღმოჩნდა, ჩვენი წინასწარი შეფასებები რეალურად გამართლდა. პრეზიდენტმა პრაქტიკულად არ დაასახელა, არ შეარჩია და არ წარუდგინა პარლამენტს უზენაესი სასამართლოს თავმჯდომარეობის კანდიდატი. ჩვენ დღესაც მზად ვართ, თუ ის წარადგენს კანდიდატს, პარლამენტმა კანონმდებლობით დადგენილი წესით განიხილოს ეს კანდიდატურა. სამოქალაქო საზოგადოებასაც ჰქონდა იგივე რეაქცია რაც პარლამენტს. ამ ეტაპზე ჩვენ არ გვქონია დამატებითი მსჯელობა კანდიდატთან დაკავშირებით, როდესაც საპარლამენტო სესია დაიწყება ამაზე დამატებით ვიმსჯელებთ“, -  განაცხადა არჩილ თალაკვაძემ.

24 აგვისტოს გაირკვა, რომ პრეზიდენტი უზენაესი სასამართლოს თავმჯდომარის კანდიდატურას აღარ წარადგენს. 

პრეზიდენტის გადაწყვეტილებას სახალხო დამცველმა სამწუხარო უწოდა. განცხადება არ გაჰკვირვებია იუსტიციის მინისტრს, თეა წულუაკინი ამბობს, რომ თავიდანვე გაურკვეველი იყო პრეზიდენტის პოზიცია. საპარლამენტო უმრავლესობის წარმომადგენელი, მამუკა მდინარაძე კი ფიქრობს, რომ პრეზიდენტი არაადეკვატური ხდება.

პრეზიდენტის სასახლეში უზენაესი სასამართლოს თავმჯდომარეობის კანდიდატის შესარჩევად კონსულტაციები 6 აგვისტოს დაიწყო. კონსულტაციებს ჯერ მმართველი გუნდი, ხოლო მოგვიანებით არასამთავრობო სექტორიც გამოეთიშა.

უზენაესი სასამართლოსა და იუსტიციის უმაღლესი საბჭოს თავმჯდომარემ ნინო გვენეტაძემ თანამდებობის დატოვების შესახებ 2 აგვისტოს განაცხადა და ამის მიზეზად ჯანმრთელობის მდგომარეობა დაასახელა.

ნინო გვენეტაძე უზენაესი სასამართლოს თავმჯდომარის პოსტზე საქართველოს პარლამენტმა 2015 წლის 20 მარტს აირჩია. მან ამ პოზიციაზე კოტე კუბლაშვილი შეცვალა. უზენაესი სასამართლოს თავმჯდომარის კანდიდატად გვენეტაძე პრეზიდენტმა გიორგი მარგველაშვილმა შეარჩია და პარლამენტს წარუდგინა.