კობახიძე: შამბამ პრაქტიკულად აღიარა ის, რასაც ათწლეულებია ვამტკიცებთ

პარლამენტის თავმჯდომარე ირაკლი კობახიძე მიიჩნევს, რომ ოკუპირებული აფხაზეთის ყოფილი დეფაქტო პრემიერმინისტრი სერგეი შამბა თავის ბოლო განცხადებებში აღიარებს იმას, რაზეც ოფიციალური თბილისი ბოლო ათწლეულების განმავლობაში ლაპარაკობს. ამის შესახებ 1tv წერს.

„საინტერესო ფრაზები მოვისმინეთ, მათ შორის, შამბამ აღიარა ის, რაზეც ვსაუბრობდით ამდენი წლის განმავლობაში. კერძოდ, საუბარია ისტორიაზე. თქვენ იცით, როგორია დღეს დამოუკიდებლობის ხარისხი და შესაბამისად, როგორი იყო მისი დამოუკიდებლობის ხარისხი. რასაც ჩვენ ვამტკიცებდით ათწლეულების განმავლობაში, პრაქტიკულად, ის აღიარა შამბამ. ეს არის ძალიან ნიშანდობლივი და საინტერესო“, - განაცხადა პარლამენტის თავმჯდომარემ.

პარლამენტის თავმჯდომარე ამბობს, რომ საქართველოს ცენტრალური ხელისუფლების მიდგომა ოკუპირებულ ტერიტორიებთან დაკავშირებით მშვიდობიანია და ამ მიმართულებით, ნაბიჯები იდგმება.

„ჩვენ ვართ ორიენტირებულნი იმაზე, რომ მაქსიმალურად აღვადგინოთ ნდობა ქართველებსა და აფხაზებს შორის. თუმცა, არის ხელოვნური ბარიერები და ამ ხელოვნურ ბარიერებს ქმნის რუსეთის ფედერაცია, რაც ართულებს ამ პროცესს. ჩვენ ვიქნებით პრინციპულები ამ პოლიტიკაში დავამტკიცეთ სამშვიდობო ინიციატივა, გადაიდგმება შემდეგი ნაბიჯები და ჩვენი სურვილია, რომ მაქსიმალურად ხელი შევუწყოთ მოქალაქეებს შორის ურთიერთობების დაახლოებას“,- განაცხადა ირაკლი კობახიძემ.

აფხაზეთის ყოფილი დეფაქტო პრემიერმინისტრის სერგეი შამბას განცხადებით, თუ აფხაზეთში ვითარება არ გამოსწორდება, აფხაზებს "მუხლებზე დადგომა და საქართველოსთვის ან რუსეთისთვის თავიანთ შემადგენლობაში მიღების თხოვნით მიმართვა" მოუწევთ. 

ოკუპირებულ აფხაზეთში ე.წ. ოპოზიცია აცხადებს, რომ აფხაზეთი დეფაქტო სახელმწიფოებრიობის დაკარგვის ზღვარზეა. არსებულ ვითარებაში ოპონენტები დეფაქტო მთავრობას ადანაშაულებენ და სურთ, რომ პრეზიდენტმა თანამდებობა დატოვოს.