ჩუგოშვილი: აფხაზეთი მხოლოდ საქართველოს ფარგლებში განვითარდება

აფხაზეთის ყოფილი დეფაქტო პრემიერმინისტრის სერგეი შამბას განცხადებას აფხაზეთის საქართველოს ან რუსეთის შემადგენლობაში შესაძლო შესვლასთან დაკავშირებით, პარლამენტის ვიცესპიკერი თამარ ჩუგოშვილი გამოეხმაურა. მის კომენტარს 1tv ავრცელებს.

ჩუგოშვილის განცხადებით, სერგეი შამბას განცხადება ძალიან საყურადღებოა, მაგრამ სიფრთხილეა საჭირო, როგორც რეაგირების, ისე კომენტირების თვალსაზრისით.

"ჩვენი პოლიტიკა არის სამშვიდობო პოლიტიკა. ვცდილობთ, შევქმნათ ისეთი გარემო, სადაც აფხაზეთის რეგიონში მცხოვრებ მოსახლეობასაც ექნება საშუალება განვითარდეს. ცალსახად მგონია, რომ აფხაზეთის რეგიონის განვითარების გზა არის საქართველოსთან ერთად განვითარება. რაც უფრო მეტად გაიაზრებს ამას მოსახლეობა, მთლიანად საქართველოს ტერიტორიისთვის, მათ შორის ოკუპირებული აფხაზეთისთვის ძალიან სასიკეთო იქნება“, – განაცხადა თამარ ჩუგოშვილმა.

ჩუგოშვილმა დასძინა, რომ ხელისუფლების ამოცანა კონფლიქტის მშვიდობიანი გზით მოგვარებაა. 

"განვავითაროთ ჩვენი ქვეყანა მთლიანად, აფხაზეთის რეგიონის ჩათვლით და იმედია, რომ შესაბამისი სენტიმენტები გაჩნდება ოკუპირებულ ტერიტორიებზე მცხოვრებ მოსახლეობას შორისაც. სხვა განცხადებების გაკეთება იქნება რთული ამ ეტაპზე, რადგან დიდი სიფრთხილით უნდა მოვეკიდოთ ამას. ძალიან დიდი იმედი მაქვს, რომ როგორც ჩანს, ასეთი განწყობები ჩნდება, რაც უზრუნველყოფს, იქ მცხოვრებმა მოსახლეობამ გაიაზროს, რომ საქართველოს გარეშე რეგიონი ვერ განვითარდება.

რუსეთი აფხაზეთს არ მისცემს განვითარების შესაძლებლობას, ამას მისცემს მხოლოდ საქართველო საქართველოს შემადგენლობაში“, – განაცხადა თამარ ჩუგოშვილმა.

აფხაზეთის ყოფილი დეფაქტო პრემიერმინისტრის სერგეი შამბას განცხადებით, თუ აფხაზეთში ვითარება არ გამოსწორდება, აფხაზებს "მუხლებზე დადგომა და საქართველოსთვის ან რუსეთისთვის თავიანთ შემადგენლობაში მიღების თხოვნით მიმართვა" მოუწევთ. 

ოკუპირებულ აფხაზეთში ე.წ. ოპოზიცია აცხადებს, რომ აფხაზეთი დეფაქტო სახელმწიფოებრიობის დაკარგვის ზღვარზეა. არსებულ ვითარებაში ოპონენტები დეფაქტო მთავრობას ადანაშაულებენ და სურთ, რომ პრეზიდენტმა თანამდებობა დატოვოს.