გურამ კაშიას მხარდასაჭერად სოციალურ ქსელებში კამპანია დაიწყო

რას აპირებენ „ქართული მარშის“ წევრები 9 სექტემბერს „დინამო არენაზე“- სწორედ ამ თემაზე ჰქონდათ კითხვები სამართალდამცველებს „ქართული მარშისა“ და „პატრიოტთა ალიანსის“ წევრთან.

კონსტანტინე მორგოშიას გამოკითხვა თბილისის მთავარ სამმართველოში სამ საათის განმავლობაში მიმდინარეობდა. მორგოშია 9 სექტემბერს საქართველოს ეროვნული ნაკრების მატჩის ჩაშლით იმუქრება და ამბობს, რომ კაშიას ეროვნული ნაკრების მაისურით თამაშის უფლებას არ მისცემს. საქმე ისევ ლგბტ თემის მხარდამჭერ სამკლაურს ეხება, რომელიც კაშიამ გასულ სეზონში ჰოლანდიის კლუბ „ვიტესში“ თამაშისას გაიკეთა.

გურამ კაშიას მხარდასაჭერად სოციალურ ქსელებში კამპანია დაიწყო და აქციაც დაიგეგმა. პოლიციის დიღმის სამმართველოში ქართული მარშის მხარდამჭერთა გამოკითხვები კი ისევ გრძელდება. 

28 აგვისტოს ცნობილი გახდა, რომ ფეხბურთელმა გურამ კაშიამ თავისი Facebook-ის გვერდი გააუქმა და ამის მიზეზი მოგვიანებით განმარტა. „მე სანამ ერთი გულშმატკივარი მაინც მეყოლება ჩვენს ქვეყანაში იმ ადამიანისთვის გამოვცხადდები ნაკრებში. მე მიყვარს ჩემი ქვეყანა, ჩემი კულტურა, მე რელიგიური ადამიანი ვარ,“ - წერს კაშია Instagram-ზე. 

გურამ კაშიას მიმართ საზოგადოების გარკვეულმა ნაწილმა აგრესია მას შემდეგ გამოხატა, რაც გასულ სეზონში ჰოლანდიის კლუბ „ვიტესში“ თამაშისას, მან საჯაროდ მხარი დაუჭირა თანასწორობის იდეას და ჰოლანდიის ყველა სხვა კლუბის კაპიტნის მსგავსად, ლგბტ თემის მხარდამჭერი სამკლაური გაიკეთა.

ამ ნაბიჯისთვის, „უეფას“ გადაწყვეტილებით, Equal Game-ის ჯილდოს პირველი მფლობელი გურამ კაშია გახდა. პრიზი იმ მოთამაშეს გადაეცემა, რომელიც სამაგალითოდ მოიქცა ევროპულ ფეხბურთში ინკლუზიურობის, მრავალფეროვნებისა და ხელმისაწვდომობის პოპულარიზაციის კუთხით.

ჯილდო ფეხბურთელს 30 აგვისტოს, მონაკოში „უეფას“ ჩემპიონთა ლიგის ჯგუფური ეტაპის წილისყრისას გადაეცემა.

ფეხბურთელმა გურამ კაშიამ ლგბტ პირთა მხარდამჭერი სამკლაურით 16 ოქტომბერს იასპარეზა, რის გამოც გულშემატკივრების ნაწილის კრიტიკა დაიმსახურა. ფეხბურთელმა მათ კრიტიკას უპასუხა. მოგვიანებით, კი სამკლაურის გაკეთების მიზეზი კიდევ ერთხელ განმარტა.