გურამ კაშიას მიმართ მუქარის გამო პატრიოტთა ალიანსის წევრი პოლიციაში იკითხება

დიღმის მთავარ სამართველოში, სპორტსმენ გურამ კაშიაზე მუქარის გამო "პატრიოტთა ალიანსის" წევრი, კონსტატინტინე მორგოშია იკითხება.

მორგოშია 9 სექტემბერს საქართველოს ეროვნული ნაკრების მატჩის ჩაშლით იმუქრება და ამბობს, რომ კაშიას ეროვნული ნაკრების მაისურით თამაშის უფლებას არ მისცემს. საქმე ისევ ლგბტ თემის მხარდამჭერ სამკლაურს ეხება, რომელიც კაშიამ გასულ სეზონში ჰოლანდიის კლუბ „ვიტესში“ თამაშისას გაიკეთა.

საგამოძიებო უწყებას მორგოშიასთან შეკითხვები მას შემდეგ გაუჩნდა, რაც 28 აგვისტოს მან თავის Facebook-ზე გურამ კაშიას მისამართით შეურაცხმყოფელი, ჰომოფობიური და მუქარისშემცველი პოსტი გაავრცელა. 

სამმართველოში შესვლამდე კონსტანტინე მორგოშიამ თქვა, რომ ის თავის პოსტში მუქარისშემცველ ფაქტებს ვერ ხედავს. 

ცოტა ხნის წინ "ქართული მარშის" წევრმა სანდრო ბრეგაძემ თქვა, რომ 9 სექტემბერს დაგეგმილ მატჩზე სავარაუდოდ გურამ კაშიას ფოტოსურათებს დაწვავენ. მან ამის შესახებ დიღმის პოლიციის სამმართველოსთან კონსტანტინე მორგოშიას მხარდასაჭერად მისულმა თქვა. 

"მშვიდობიანი პროტესტი თავის თავში გულისხმობს რაღაც სიმბოლოკის გამოტანას, შეიძლება რომელიმე ფეხბურთელის ფოტოსურათის დაწვას, შეძახილებს, სკანდირებებს და სხვას მეტს არაფერს. აი ამისი ეშინიათ. ლევან კობიაშვილმა და გურამ კაშიამ, ჩემს ხელთ არსებული დაზუსტებული ინფორმაციით, დაურეკეს შს მინისტრს ბატონ გახარიას და მას კონსტანტინე მორგოშიას და სხვა აქტივისტების გაჩერება მოსთხოვეს", - თქვა სანდრო ბრეგაძემ.

28 აგვისტოს ცნობილი გახდა, რომ ფეხბურთელმა გურამ კაშიამ თავისი Facebook-ის გვერდი გააუქმა და ამის მიზეზი მოგვიანებით განმარტა. „მე სანამ ერთი გულშმატკივარი მაინც მეყოლება ჩვენს ქვეყანაში იმ ადამიანისთვის გამოვცხადდები ნაკრებში. მე მიყვარს ჩემი ქვეყანა, ჩემი კულტურა, მე რელიგიური ადამიანი ვარ,“ - წერს კაშია Instagram-ზე. 

გურამ კაშიას მიმართ საზოგადოების გარკვეულმა ნაწილმა აგრესია მას შემდეგ გამოხატა, რაც გასულ სეზონში ჰოლანდიის კლუბ „ვიტესში“ თამაშისას, მან საჯაროდ მხარი დაუჭირა თანასწორობის იდეას და ჰოლანდიის ყველა სხვა კლუბის კაპიტნის მსგავსად, ლგბტ თემის მხარდამჭერი სამკლაური გაიკეთა.

ამ ნაბიჯისთვის, „უეფას“ გადაწყვეტილებით, Equal Game-ის ჯილდოს პირველი მფლობელი გურამ კაშია გახდა. პრიზი იმ მოთამაშეს გადაეცემა, რომელიც სამაგალითოდ მოიქცა ევროპულ ფეხბურთში ინკლუზიურობის, მრავალფეროვნებისა და ხელმისაწვდომობის პოპულარიზაციის კუთხით.

ჯილდო ფეხბურთელს 30 აგვისტოს, მონაკოში „უეფას“ ჩემპიონთა ლიგის ჯგუფური ეტაპის წილისყრისას გადაეცემა.

ფეხბურთელმა გურამ კაშიამ ლგბტ პირთა მხარდამჭერი სამკლაურით 16 ოქტომბერს იასპარეზა, რის გამოც გულშემატკივრების ნაწილის კრიტიკა დაიმსახურა. ფეხბურთელმა მათ კრიტიკას უპასუხა. მოგვიანებით, კი სამკლაურის გაკეთების მიზეზი კიდევ ერთხელ განმარტა.