ფეხბურთის ფედერაცია კაშიასთან დაკავშირებულ მოვლენებს ეხმიანება

გურამ კაშიას მიმართ განხორციელებულ აგრესიას საქართველოს ფეხბურთის ფედერაციამ ვიცეკაპიტნის მხარდაჭერი განცხადებით უპასუხა.

ფედერაციის ვიცეპრეზიდენტის ნიკა ჯღარკავას განცხადებით, UEFA-ს ჯილდოს მიღება მნიშვნელოვანია ქართული ფეხბურთისთვის და გურამ კაშიას უსაფრთხოებისთვის ფედერაცია ეროვნული ნაკრების თამაშის დროს სტადიონზე დაცვას გააძლიერებს.

„ჩვენ კვლავ ვეწინააღმდეგებით ყოველგვარი სახის დისკრიმინაციას, ძალადობას და გვერდში ვუდგავართ გურამს მის ამ გადაწყვეტილებაში და ყველანაირ მხარდაჭერას ვუცხადებთ მას. საგულისხმოა ის, რომ ეს ყველაფერი ხდება მოახლოებული მატჩების ფონზე, თუმცა, რა თქმა უნდა, მატჩების ორგანიზების და უსაფრთხოების საკითხი მოგვარებული იქნება სათანადო დონეზე და ჩვენ დღეს, როგორც ფეხბურთის ფედერაცია, ისევე გუნდი, მხოლოდ და მხოლოდ ვფიქრობთ სპორტულ შედეგზე“ ნათქვამია ჯღარკავას განცხადებაში.

გუშინ ცნობილი გახდა, რომ ფეხბურთელმა გურამ კაშიამ თავისი Facebook-ის გვერდი გააუქმა და ამის მიზეზი მოგვიანებით განმარტა. „მე სანამ ერთი გულშმატკივარი მაინც მეყოლება ჩვენს ქვეყანაში იმ ადამიანისთვის გამოვცხადდები ნაკრებში. მე მიყვარს ჩემი ქვეყანა, ჩემი კულტურა, მე რელიგიური ადამიანი ვარ,“ - წერს კაშია Instagram-ზე. 

გურამ კაშიას მიმართ საზოგადოების გარკვეულმა ნაწილმა აგრესია მას შემდეგ გამოხატა, რაც გასულ სეზონში ჰოლანდიის კლუბ „ვიტესში“ თამაშისას, მან საჯაროდ მხარი დაუჭირა თანასწორობის იდეას და ჰოლანდიის ყველა სხვა კლუბის კაპიტნის მსგავსად, ლგბტ თემის მხარდამჭერი სამკლაური გაიკეთა.

ამ ნაბიჯისთვის, „უეფას“ გადაწყვეტილებით, Equal Game-ის ჯილდოს პირველი მფლობელი გურამ კაშია გახდა. პრიზი იმ მოთამაშეს გადაეცემა, რომელიც სამაგალითოდ მოიქცა ევროპულ ფეხბურთში ინკლუზიურობის, მრავალფეროვნებისა და ხელმისაწვდომობის პოპულარიზაციის კუთხით.

ჯილდო ფეხბურთელს 30 აგვისტოს, მონაკოში „უეფას“ ჩემპიონთა ლიგის ჯგუფური ეტაპის წილისყრისას გადაეცემა.

ფეხბურთელმა გურამ კაშიამ ლგბტ პირთა მხარდამჭერი სამკლაურით 16 ოქტომბერს იასპარეზა, რის გამოც გულშემატკივრების ნაწილის კრიტიკა დაიმსახურა. ფეხბურთელმა მათ კრიტიკას უპასუხა. მოგვიანებით, კი სამკლაურის გაკეთების მიზეზი კიდევ ერთხელ განმარტა.