გრიგოლ ვაშაძის შტაბი ტყუის, თავად პრეზიდენტობის კანდიდატი კი კომენტარს არ აკეთებს

„ნაციონალური მოძრაობის“ ოპოზიციური ერთობის „ძალა ერთობაშია“ პრეზიდენტობის კანდიდატის, გრიგოლ ვაშაძის საარჩევნო შტაბის ხელმძღვანელმა გიორგი ვაშაძემ დღეს ბრიფინგი გამართა და ტელეკომპანია „იმედი“ ყალბი ინფორმაციის გავრცელებაში დაადანაშაულა.

ვაშაძემ ჟურნალისტური ეთიკის ქარტიას საკითხის შესწავლისკენ მოუწოდა.

ლაპარაკია გრიგოლ ვაშაძის სოციალურ ქსელში გავრცელებულ ინტერვიუს ფრაგმენტზე, რომელიც 2008 წლით თარიღდება, როდესაც ვაშაძე საგარეო საქმეთა მინისტრის მოადგილე იყო. ინტერვიუში „ნაციონალური მოძრაობის“ წევრი და პრეზიდენტობის კანდიდატი ამბობს, რომ „იმის პროვოცირება რაც კოკოითის რეჟიმმა ცხინვალში სცადა, თვითშემოქმედება იყო და მოსკოვიც კი არ იყო ამისთვის მზად“.

„უკვე ორი დღეა, ტელეკომპანია „იმედის“ მეშვეობით ხდება ე.წ. ფეიკ-ნიუსის გავრცელება ჩვენ კანდიდატ გრიგოლ ვაშაძეზე. გვესმის, რომ ჩვენი კონკურენტები შეშფოთებულები არიან უკანასკნელი კვლევებით, რომელშიც ლიდერობს გრიგოლ ვაშაძე იმიტომ, რომ ის არის ღირსეული კანდიდატი, რომელიც დიდ როლს შეასრულებს, როგორც საქართველოს პრეზიდენტი მომავალში. განცხადება, რომელიც გრიგოლ ვაშაძემ გააკეთა და რომელსაც ტელეკომპანია "იმედი" არასწორ კონტექსტში ატრიალებს, 2008 წლის ომამდე გაკეთდა. ეს განცხადება პირიქით მიუთითებს, რომ მაშინდელი ხელისუფლება ყველაფერს აკეთებდა, რათა თავიდან აერიდებინა შეიარაღებული კონფლიქტი და ის აგრესია, რაც რუსეთის ფედერაციის მხრიდან მივიღეთ. იმედი ისე აშუქებს, რომ თითქოს, ეს განცხადება ომის მიმდინარეობის პერიოდშია გაკეთებული და სპეციალურად ამახინჯებს ფაქტებს. მივმართავ ჟურნალისტიკის ეთიკის ქარტიას, შეისწავლოს ეს სიუჟეტები თავიდან ბოლომდე იმიტომ, რომ ეს არღვევს ყველა ნორმას. არ შეიძლება, მედიასაშუალებები ფაქტებს თავიდან ბოლომდე ამახინჯებდნენ,“ - აღნიშნა ვაშაძემ.

ტელეომპანია „იმედის“ მიერ მომზადებულ არცერთ მასალაში ნათქვამი არ არის, რომ პრეზიდენტობის კანდიდატი გრიგოლ ვაშაძე ამ ფრაზას 2008 წლის აგვისტოს ომის დროს წარმოთქვამს. გავრცელებული ინფორმაციით ვაშაძის ციტატა თარიღდება 2008 წლით, თუმცა თვე უცნობია. „იმედი“ რამდენიმე დღეა ცდილობს ინტერვიუს ფრაგმენტის ზუსტი თარიღის დადგენას, თუმცა ამის დამადასტურებელ ზუსტ ცნობას არც გრიგოლ ვაშაძე და არც მისი შტაბი მედიას არ აწვდის. ვიდეოს თანახმად, ამ ინტერვიუს სრული ვერსია ტელეკომპანია „რუსთავი 2“-ის არქივშია, თუმცა მასალას ამ ტელევიზიის წარმოამდგენლებიც არ აქვეყნებენ. თავად პრეზიდენტობის კანდიდატი გრიგოლ ვაშაძე კი კომენტარს არ აკეთებს და პრესასთან არ ჩნდება.

„ნაციონალური მოძრაობა“ და მასთან აფილირებული პოლიტიკური ჯგუფები 2008 წლის აგვისტოს ომში საქართველოს იმდროინდელი ხელისუფლების („ნაციონალური მოძრაობა“) საპასუხო ქმედებებისა და ქცევის ადეკვატურობის შესახებ დასმულ ნებისმიერ შეკითხვას, როგორც პოლიტიკური ოპონენტების ასევე საზოგადოების ნებისმიერი წარმომადგენლის მხრიდან, აცხადებენ რუსეთის მიმართ ლოიალურობის გამოხატულებად და საქართველოს ღალატად.

იურისტები განმატავენ, რომ ამომრჩეველს უფლება აქვს იცოდეს, თუ რას ფიქრობს საპრეზიდენტო კანდიდატი რუსეთ-საქართველოს ურთიერთობაზე. „ქართულ ოცნებაში“ მიიჩნევენ, რომ გრიგოლ ვაშაძემ პოლიტიკური უპასუხისმგებლობა გამოიჩინა.

გრიგოლ ვაშაძე 10 ოპოზიციური პარტიის გაერთანებამ საპრეზიდენტო კანდიდატად 17 ივლისს წარადგინა

საქართველოში საპრეზიდენტო არჩევნები 2018 წლის ოქტომბერში გაიმართება.