ევროპულ საქართველოს რუსული პროპაგანდის შეზღუდვა საკანონმდებლო დონეზე სურს

ხმაურით დაიწყო თბილისში ვლადიმერ პუტინის საგრანტო ფონდიდან დაფინანსებული მედიაფორუმი. ღონისძიების რუს დელეგატებს აქციით დახვდნენ. ფორუმი პროტესტის ნიშნად ქართველმა მონაწილეებმა დატოვეს. ამასთან, შეიცვალა ღონისძიების დღის წესრიგიც.

აქციის მონაწილეებმა რუსეთის წარმომადგენელს კითხვითაც მიმართეს, გრძნობს თ არა თავს ოკუპანტად. თუმცა დიმიტრი კოსარევმა აღნიშნა, რომ ის რუსეთის მიერ საქართველოს ოკუპაციის საკითხს კარგად იცნობს, ამიტომ კომენტარს არ გააკეთებს.

ქვეყნის კანონმდებლების უმრავლესობა ფიქრობს, რომ ეს ფორუმი ოკუპაციასთან დაკავშრებით საზოგადოებრივ აზრს ვერ შეცვლის. თუმცა ოპოზიცია ანტიდასავლური პროპაგანდის გაძლიერებაზე მიუთითებს და ფორუმის ჩატარების წინააღმდეგია.

ვიცესპიკერის გია ვოლსკის განცხადებით, მას არ ჰგონია, რომ რუს ჟურნალისტებს ქართული "საზოგადოების ტვინის გამორეცხვის რესურსი ჰქონდეთ".

" ერთადერთი, ვისაც პოლიტიკური სარგებელი შეიძლება ჰქონდეს ამ ჩამოსვლიდან, სკანდალური კითხვებიდან და პასუხებიდან არის „ნაციონალური მოძრაობა“. თუმცა არ მგონია, მათაც გაიმარჯვონ ამ თემის წამოწევაში. თბილისში ჩამოსვლის გარეშეც ვიცით მათი პოზიცია. მ ათი საუბარი არაფერს ცვლის საქართველოს მთავრობის დამოკიდებულებაში, მთავრობის საგარეო პოლიტიკაში ან საზოგადოების ცნობიერებაში, რომ საქართველოში რუსეთის აგრესია და ოკუპაცია მოხდა", - განაცხადა გია ვოლსკიმ.

როგორც სააგენტო "ინტერპრესნიუსი" წერს, ევროპული საქართველოს წევრის, დეპუტატ სერგი კაპანაძის განცხადებით, იმისთვის, რომ რუსული პროპაგანდა შეიზღუდოს, საკანონმდებლო ცვლილებები უნდა გატარდეს. 

"ეს ყველაფერი ფინანსდება რუსული ფულით და ეს არის ჩვენი ქვეყნის დაცინვა რუსეთის მხრიდან. სამწუხაროა, რომ ეს ხდება დღეს, 21-ე საუკუნეში, აგვისტოს ომიდან 10 წლის შემდეგ, მას შემდეგ, რაც მთელმა მსოფლიომ ნახა, თუ რას წარმოადგენს რუსეთი. სამწუხაროა, რომ ეს ხელისუფლება ამას უშვებს. მე მაქვს წინადადება და ჩვენი პოლიტიკური გუნდი ამ წინადადებას ოფიციალურად გააჟღერებს, რომ გარკვეული ნაბიჯები იქნას გადადგმული, მათ შორის საკანონმდებლო ნაბიჯები, რომ რუსული პროპაგანდა საქართველოში იყოს შეზღუდული. ეს მძლავრი პროპაგანდისტული მანქანა, რომელიც მოქმედებს მთელი გაქანებით, საქართველოში იყოს ფრთებშეჭრილი და შეზღუდული", - განაცხადა სერგი კაპანაძემ.

ქართველი ანალიტიკოსები და პოლიტიკოსები უკლებლივ თანხმდებიან იმაზე, რომ ფორუმი ანტიდასავლური პროპაგანდის ნაწილია. 

ოკუპირებული ტერიტორიების შესახებ კანონის დარღვევისთვის, 4 სექტემბერს საქართველოში არ შემოუშვეს ფორუმის სამი მონაწილე - რუსული სააგენტოს, „ტასის“ სამხედრო მიმომხილველი ვიქტორ ლიტოვკინი, „რუსული საზოგადოების მკვლევართა ასოციაციის საერთაშორისო საბჭოს“ ხელმძღვანელი გენადი ბორდიუგოვი და ტელეკომპანია „ენტევეს“ ჟურნალისტი ალექსანდრ ტოკარევი. ასევე საბაჟო გამშვებ პუნქტ დარიალზე საქართველოს ტერიტორიაზე შემოსვლაზე რუსეთის კიდევ ერთ მოქალაქეს, ალან კასაევს უთხრეს უარი. 

მედიაფორუმის ორგანიზატორები არიან რუსეთის პოლიტოლოგიური ცენტრი „Север-Юг,“ პრესკლუბი „თანამეგობრობა“ და გაზეთი „საქართველო და მსოფლიო.“