ვოლსკი: რუსულ პროპაგანდასთან ბრძოლა შექმნის წარმოდგენას, თითქოს მისი გავლენის საშიშროება არსებობს

პარლამენტის ვიცესპიკერი და უმრავლესობის წევრი გია ვოლსკი რუსული პროპაგანდის შეზღუდვაზე ევროპული საქართველოს ინიციატივას ეხმიანება. გია ვოლსკის განცხადებით, რუსული პროპაგანდის საკანონმდებლო დონეზე აკრძალვასთან დაკავშირებით სერგი კაპანაძის ინიციატივა არასწორია. ინფორმაციას სააგენტო "ინტერპრესნიუსი" ავრცელებს.

ვოლსკი ფიქრობს, რომ თანამედროვე ტექნიკის პირობებში პროპაგანდის აკრძალვის რესურსი ნაკლებად თუ არსებობს. ვოლსკის თქმით, ქვეყანაში "აკრძალული ხილის სინდრომი არ უნდა გაჩნდეს".

"მე არ მინდა, რაც მთავარია, ისე წარმოვადგინოთ ჩვენი თავი, საზოგადოება და მთავრობა, თითქოს რამოდენიმე ჟურნალისტის ჩამოსვლამ რუსული პროპაგანდის საფრთხის წინაშე დაგვაყენა და ტვინების გამორეცხვის საფრთხის წინაშე დააყენა საზოგადოება, რომლებმაც დამარხეს 200 სამხედრო და ამდენივე სამოქალაქო პირი.

ვფიქრობ, „ნაციონალურ მოძრაობას“ და „ახალ ნაციონალურ მოძრაობას“ გარკვეული პასუხისმგებლობა აქვს იმასთან დაკავშირებით, რაც თავს დაგვატყდა. პროპაგანდის წინააღმდეგ ასეთი ბრძოლა, როდესაც არსებობს ტექნიკის ყველანაირი საშუალება, რომ ინფორმაციამ შემოაღწიოს, მხოლოდ რუსების წისქვილზე დაასხამს წყალს, ვინაიდან, შექმნის გარემოებას და იმ წარმოდგენას, თითქოს, ჩვენთან არსებობს ამ პროპაგანდის გავლენის საშიშროება. მე არ ვფიქრობ, რომ ეს სწორი გადაწყვეტილებაა.

„აკრძალული ხილის“ სინდრომს ნუ გავაჩენთ საქართველოში და მეორეც, არ არის საქართველოში ის ადამიანი, რომელიც ვერ ხედავს, რომ ჩვენი ტერიტორიები ოკუპირებულია და თუ არის, ესა გარკვეული პოლიტიკური ჯგუფი, რომელიც გარკვეულ პოლიტიკურ ნიშას ეძებს და მას პოლიტიკურად უნდა ვებრძოლოთ და დავამარცხოთ ,“ – განაცხადა გია ვოლსკიმ.

რუსულ პროპაგანდასთან ბრძოლის თემა აქტუალური მას შემდეგ გახდა, რაც თბილისში ვლადიმერ პუტინის საგრანტო ფონდიდან დაფინანსებული მედიაფორუმის შესახებ გახდა ცნობილი. ღონისძიების რუს დელეგატებს აქციით დახვდნენ. ფორუმი პროტესტის ნიშნად ქართველმა მონაწილეებმა დატოვეს. ამასთან, შეიცვალა ღონისძიების დღის წესრიგიც.

ქვეყნის კანონმდებლების უმრავლესობა ფიქრობს, რომ ეს ფორუმი ოკუპაციასთან დაკავშრებით საზოგადოებრივ აზრს ვერ შეცვლის. თუმცა ოპოზიცია ანტიდასავლური პროპაგანდის გაძლიერებაზე მიუთითებს და ფორუმის ჩატარების წინააღმდეგია.

ევროპული საქართველოს წევრის, დეპუტატ სერგი კაპანაძის განცხადებით, იმისთვის, რომ რუსული პროპაგანდა შეიზღუდოს, საკანონმდებლო ცვლილებები უნდა გატარდეს. 

"ეს ყველაფერი ფინანსდება რუსული ფულით და ეს არის ჩვენი ქვეყნის დაცინვა რუსეთის მხრიდან. სამწუხაროა, რომ ეს ხდება დღეს, 21-ე საუკუნეში, აგვისტოს ომიდან 10 წლის შემდეგ, მას შემდეგ, რაც მთელმა მსოფლიომ ნახა, თუ რას წარმოადგენს რუსეთი. სამწუხაროა, რომ ეს ხელისუფლება ამას უშვებს. მე მაქვს წინადადება და ჩვენი პოლიტიკური გუნდი ამ წინადადებას ოფიციალურად გააჟღერებს, რომ გარკვეული ნაბიჯები იქნას გადადგმული, მათ შორის საკანონმდებლო ნაბიჯები, რომ რუსული პროპაგანდა საქართველოში იყოს შეზღუდული. ეს მძლავრი პროპაგანდისტული მანქანა, რომელიც მოქმედებს მთელი გაქანებით, საქართველოში იყოს ფრთებშეჭრილი და შეზღუდული", - განაცხადა სერგი კაპანაძემ.