დავით უსუფაშვილმა საარჩევნო ლოგოს და სლოგანის პრეზენტაცია გამართა

პრეზიდენტობის ერთ-ერთი კანდიდატის საარჩევნო კამპანიის ლოგო იქნება: საქართველოს სახელმწიფო საზღვრებში ჩახატული ქართული ანბანი. უსუფაშვილი ამბობს, რომ სახელმწიფოს მეთაურის მთავარი საზრუნავია ამ ტერიტორიაზე ქართული სახელმწიფოებრიობის თანაბარი გავრცელება, განმტკიცება და გაძლიერება.

უსუფაშვილის საარჩევნო სლოგანია იქნება: „მეტი>შეგვიძლია“.

„გარეშე მტრებისა და პერსონალურ ქიშპობაში გართული შიდა პოლიტიკური ძალების გავლენით სულ უფრო ბევრ მოქალაქეს იპყრობს იმის განცდა, რომ ამ ქვეყანას მეტი არ შეუძლია და ამ ქვეყანაში მას მეტი აღარ შეუძლია. ამიტომ ბევრი ან ტოვებს ქვეყანას, ან რჩება ქვეყანაში, მაგრამ სრულად ემიჯნება საჯარო ცხოვრებას, ანუ საკუთარ სახელმწიფოს. ეს ტენდენცია ქართულ სახელმწიფოს თვითლიკვიდაციისკენ მიაქანებს. „მეტი>შეგვიძლია“ ნიშნავს ეროვნულ-სახელმწიფოებრივი თავმოყვარეობის და თვითრწმენის აღდგენას და განმტკიცებას; საჭიროა დავიბრუნოთ აღმაშენებლის, ექვთიმეს, ანწუხელიძის დარი რწმენა, რომ შეგვიძლია და მაშინ ყველაფერს შევძლებთ”, - განაცხადა დავით უსუფაშვილმა.

10 აგვისტოს „შენების მოძრაობამ", „თავისუფალმა დემოკრატებმა" და „ეროვნულმა ფორუმმა" ცენტრალურ საარჩევნო კომისიაში ერთობლივ საპრეზიდენტო კანდიდატად დავით უსუფაშვილი დაარეგისტრირეს.

პარლამენტის ყოფილმა სპიკერმა (2012-2016) და "რესპუბლიკური პარტიის" ყოფილმა თავმჯდომარემ (2005 - 2013) საკუთარი პარტია „შენების მოძრაობა“ 2017 წლის ზაფხულში შექმნა.

საპრეზიდენტო არჩევნების წინ მან კონსულტაციები მოქმედ პრეზიდენტთან 20 ივლისს გამართა. სწორედ მაშინ გაირკვა, რომ „შენების მოძრაობის“ ლიდერი გიორგი მარგველაშვილს ცენტრისტული მოძრაობის შექმნასა და ახალი ვადით პრეზიდენტობისთვის ბრძოლას სთავაზობდა. პასუხს ის 1 აგვისტომდე დაელოდებოდა, უარის შემთხვევაში კი - თავად იყრიდა კენჭს.

უსუფაშვილის ახლად შექმნილი პარტია „შენების მოძრაობა“ 2017 წლის თვითმმართველობის არჩევნებში მონაწილეობდა და ხმათა 0.76% მიიღო.

საპრეზიდენტო არჩევნები საქართველოში 28 ოქტომბერს გაიმართება.